2026-njy ýylyň 28–30-njy apreli aralygynda Türkmenistanyň Söwda-senagat edarasynda «Söwda-ykdysady hyzmatdaşlygyň täze mümkinçilikleri» atly Türkmen-Hytaý söwda-ykdysady forumy geçiriler. Çäräniň guramaçylary hökmünde Türkmenistanyň Söwda-senagat edarasy hem-de Hytaýyň Daşary ýurtlarda ösüş assosiasiýasy (CODA) «TALWAS ÝOLY» ÝGPJ we «Oguz Forum & Expo» çykyş edýär.

 

Forumyň esasy maksady iki ýurduň arasyndaky işewür gatnaşyklary pugtalandyrmak hem-de özara bähbitli hyzmatdaşlygyň täze ugurlaryny açmakdan ybaratdyr. Çäräde gurluşyk, energetika, uglewodorod serişdeleriniň çykarylyşy, ulag-logistika ulgamy, oba hojalygy, innowasiýalar we IT, ýeňil we agyr senagat ýaly ugurlar boýunça bilelikdäki senagat we önümçilik mümkinçilikleri ara alnyp maslahatlaşylar.

 

Forumyň möhüm bölekleriniň biri oba hojalygynyň häzirki zaman ösüşi we azyk howpsuzlygy bilen baglanyşyklydyr. Onda ösümlikçiligiň täze usullary, sanly tehnologiýalar we ekologik taýdan durnukly önümçiligi üpjün edýän innowasion çözgütler bilen tanyşdyrylar.

 

Mundan başga-da, forumda ulag we logistika ulgamyndaky hyzmatdaşlyk meselesi aýratyn üns berilmeli meleleriň hatarynda bolar. Türkmenistan halkara ulag geçelgelerinde strategiki halkalaryň biri hökmünde öz mümkinçiliklerini giňişleýin hödürlär. Multimodal ulag geçelgelerini ösdürmek, sebitleriň arasyndaky logistiki baglanyşygy güýçlendirmek boýunça taslamalar maslahatlaşylar.

 

Foruma dürli pudaklardan takmynan 500 wekiliýetiň, şol sanda Hytaýyň iri assosiasiýalarynyň ýolbaşçylarynyň, döwlet edaralarynyň wekilleriniň, öňdebaryjy kompaniýalaryň ýolbaşçylarynyň gatnaşmagyna garaşylýar. Bu bolsa forumyň Türkmenistanyň we Hytaýyň arasyndaky hyzmatdaşlygy täze derejä çykarmakdaky ähmiýetini görkezýär.