Türkmenistanyň Mejlisinde Ýewropa Bileleşiginiň «SWITCH-Asia» maksatnamasynyň Türkmenistandaky milli utgaşdyryjysy we Merkezi Aziýanyň Parlament platformasynyň Sirkulýar ykdysadyýet boýunça sebitleýin dialogynyň uly milli bilermeni bilen parlamentiň wekilleriniň brifing duşuşygy geçirildi. Bu barada Türkmenistanyň Mejlisiniň resmi saýtynda habar berildi.

26-njy maýda bolan duşuşykda «SWITCH-Asia» maksatnamasynyň çäginde guralýan sebitleýin dialogyň sirkulýar ykdysadyýeti ösdürmek, jogapkärçilikli sarp ediş we önümçilik ýörelgelerini ornaşdyrmak, ekologiýa syýasaty hem-de «ýaşyl» kanunçylygy ilerletmekde möhüm we netijeli meýdança bolup durýandygy bellenildi.

Gepleşikleriň dowamynda «ýaşyl» ykdysadyýet ýörelgelerini durmuşa ornaşdyrmak we sirkulýar (aýlawly) ykdysadyýete geçmek boýunça Türkmenistanyň toplan öňdebaryjy tejribesine hem-de Garaşsyzlyk ýyllarynda gazanylan sepgitlere ýokary baha berildi. Şeýle-de, ekologiýa abadançylygyny berkitmek we tebigy baýlyklardan netijeli peýdalanmak ugrunda öňde durýan wezipeleri amala aşyrmakda ýurtda durmuşa geçirilýän maksatnamalaryň ähmiýeti barada durlup geçildi.