Türkmenistanda bosgun statusyny ýa-da goşmaça we wagtlaýyn goragy almak üçin ýüz tutýan adamlary hasaba almagyň täze tertibi tassyklanyldy. Türkmenistanyň Döwlet migrasiýa gullugy tarapyndan 2025-nji ýylyň 7-nji noýabrynda kabul edilen 128-nji belgili buýruk bu ugurdaky düzgünleri kesgitleýär.

Täze tertibe laýyklykda, Türkmenistana gelen adamlar ýurduň çägine giren gününden başga, üç iş gününiň dowamynda migrasiýa gullugynyň degişli edaralarynda bolýan ýa-da ýaşaýan ýerleri boýunça hasaba durmaga borçludyrlar. Hasaba alyş Türkmenistanyň migrasiýa edaralary tarapyndan amala aşyrylýar.

Hasaba almak bosgun statusynyň ýa-da goşmaça goragyň berilmegi hakynda towakganamalaryň wagtlaýyn şahadatnamalary, bosgun şahsyýetnamalary, goşmaça ýa-da wagtlaýyn gorag berlen adamlaryň degişli resminamalary esasynda ýerine ýetirilýär. Şeýle hem Türkmenistana gyssagly ýagdaýda köpçülikleýin gelen adamlaryň wagtlaýyn ýerleşdirilmegi we olaryň Türkmenistanyň çäginde bolmagy bilen bagly meseleler bu tertipde düzgünleşdirilýär.

Bu täze düzgün 2017-nji ýylyň 3-nji iýunynda kabul edilen «Bosgunlar hakynda» Türkmenistanyň Kanunyna laýyklykda işlenip düzüldi hem-de Türkmenistanda migrasiýa hasabat ulgamyny has-da kämilleşdirmäge gönükdirilendir. Doly maglumatlar Türkmenistanyň Adalat ministrliginiň resmi çeşmelerinde elýeterlidir.