Ýanwar aýynda Türkmenistanyň mekdep okuwçylary we ýokary okuw mekdepleriniň talyplary halkara bilim bäsleşiklerinde uly üstünliklere eýe boldular. Olar halkara predmet olimpiýalarynda, ýüzbe-ýüz hem-de onlaýn görnüşlerde geçirilen ýaryşlarda jemi 62 medal gazandylar.

Bu barada wise-premýer B. Orazdurdyýewa ýylyň ýanwar aýynda ýerine ýetirilen işleriň jemlerine bagyşlanan Türkmenistanyň Hökümet mejlisinde hasabat berdi.

Hasabatda Türkmenistanyň bilim ulgamynda häzirki zaman okuw-usulyýetlerini ornaşdyrmaga, zehinli we giň dünýägaraýyşly ýaş nesli kemala getirmäge, mugallymlaryň hünär derejesini ýokarlandyrmaga gönükdirilen özgertmeleriň yzygiderli dowam etdirilýändigi bellenildi.

Şol bir wagtyň özünde, Türkmenistanyň «Saglyk» döwlet maksatnamasynyň çäginde saglygy goraýyş edaralarynda meýilnama laýyklykda işler alnyp baryldy. Gurbanguly Berdimuhamedow adyndaky Haýyr-sahawat gaznasynyň serişdeleriniň hasabyna mätäç çagalara lukmançylyk kömegi, şol sanda çylşyrymly bejergiler we operasiýalar amala aşyryldy.

Mundan başga-da, Türkmenistanda bedenterbiýäniň, sportuň we Olimpiýa hereketiniň ösdürilmegine, türgenleriň Olimpiýa oýunlaryna hem-de iri halkara ýaryşlara taýýarlanmagyna aýratyn ähmiýet berildi.

Hasabaty jemläp, Prezident Serdar Berdimuhamedow bilim edaralarynyň işini döwrüň talaplaryna laýyklykda kämilleşdirmegi, saglygy goraýyş ulgamyny halkara tejribä esaslanyp ösdürmegi we Türkmenistanyň professional türgenlerini taýýarlamak boýunça işleri güýçlendirmegi tabşyrdy.