Dünýäde gymmat bahaly metallaryň bazary täze taryhy tapgyra gadam basdy. Ilkinji gezek kümüşiň bahasy bir unsiýa üçin 75 dollardan ýokary galdy. Bu ösüş ABŞ-da göterim derejeleriniň peselmegine garaşylmagy hem-de geosyýasy dartgynlylygyň artmagy bilen baglanyşykly bolup, maýa goýum bazarlaryna we şol sanda Türkmenistanyň ykdysady gyzyklanmalaryna hem täsir edýär.

Altyn ýokary derejede durnukly saklanýar. Onuň häzirki bahasy 4518 dollar töwereginde, 2025-nji ýylyň ahyrynda bolsa taryhy iň ýokary derejesine ýetilipdi. 2026-njy ýylyň başynda tabşyrylmagy meýilleşdirilen şertnamalar hem bahalaryň ýokarlanýandygyny görkezýär.

Bilermenleriň çaklamalaryna görä, 2026-njy ýylyň birinji ýarymynda altyn 5000 dollardan, kümüş bolsa 90 dollardan geçip biler. 2025-nji ýylyň başyndan bäri kümüşiň bahasy ep-esli ýokarlandy, altyn hem güýçli ösüş görkezdi. Bu ýagdaý dünýä maliýe bazarlarynda goragly aktiwlere bolan islegiň artýandygyny we bu ugurlaryň Türkmenistan üçin hem ähmiýetlidigini görkezýär.

Platina hem bazaryň üns merkezinde galýar: taryhy iň ýokary derejesinden soň onuň bahasy ýokary derejede saklanýar. Muňa senagat isleginiň durnuklylygy itergi berýär. Altynyň rekord bahalarynyň fonunda ABŞ-da altyn gazyp almak enjamlaryna we degişli bilimlere bolan gyzyklanmanyň artmagy hem häzirki ýagdaýyň giň gerimini aýdyň görkezýär.