Oýun sanawy
Forbes zenanlar üçin iň gowy iş berijileriň sanawyny çap etdi: Netflix, Apple we Coca-Cola öň hatarda
Forbes žurnaly dünýäniň dürli ýurtlarynda zenanlar üçin iň amatly iş şertlerini döredýän kompaniýalaryň täze reýtingini mälim etdi. Bu seljerme 36 döwletiň çäginde halkara korporasiýalarda işleýän 120 müňden gowrak zenan işgäriniň pikirine esaslandy.
Kompaniýalar birnäçe görkeziji boýunça baha aldy: zähmet hakynyň derejesi, iş we şahsy durmuşyň deňagramlylygy, karýera mümkinçilikleri, iş ýerindäki atmosfera we zenanlara berilýän goldaw. Şeýle hem gender deňligi, diskriminasiýanyň ýoklugy we jemgyýetçilik abraýy göz öňünde tutuldy.
Jemi 400 kompaniýa iň ýokary ballary toplayp, sanawa girmegi başardy. Ilkinji 10-luk şeýle görnüşde ýerleşdi:
-
Microsoft (ABŞ, programma üpjünçiligi)
-
Roche Holding (Şweýsariýa, dermanlar we biotehnologiýa)
-
National Bank of Canada (Kanada, maliýe hyzmatlary)
-
Hewlett Packard Enterprise (ABŞ, IT hyzmatlar)
-
IKEA (Niderlandlar, söwda)
-
L’Oréal (Fransiýa, kosmetika we arassaçylyk)
-
Deloitte (Beýik Britaniýa, maslahat hyzmatlary)
-
Nike (ABŞ, egin-eşik we sport harytlary)
-
Netflix (ABŞ, media)
-
Apple (ABŞ, elektronika)
Soňky ýyllarda zenanlaryň zähmet şertlerinde öňegidişlik gazanylsa-da, Deloitte Global Women @ Work 2025 hasabatyna görä, 15 ýurtdan sorag edilen 7500 zenanyň diňe 5%-i häzirki iş ýerinde bäş ýyldan gowrak galmagy meýilleşdirýär. Bu bolsa zenanlar üçin has oňat iş şertlerini döretmegiň wajyplygyny görkezýär.
Şeýle hem okanyň
Iň köp görülen
Türkmenistanyň bank ulgamynyň zenan işgärleriniň arasynda döredijilik bäsleşigi geçirildi
Türkmenistanyň Jemgyýetçilik guramalarynyň merkezinde ýurdumyzyň bank pudagynda zähmet çekýän zenanlaryň arasynda döredijilik bäsleşiginiň jemleýji tapgyry geçirildi. Oňa welaýatlaryň hem-de şäherleriň saýlama tapgyrlarynda öňe çykan ýeňijiler gatnaşdy.
Bäsleşigiň ilkinji tapgyrynda gatnaşyjylar Türkmenistanyň bank ulgamyndaky ösüşler, gazanylan sepgitler hem-de 2011–2030-njy ýyllar üçin bank ulgamyny ösdürmegiň Döwlet maksatnamasy esasynda alnyp barylýan işler barada gürrüň berdiler.
Ikinji tapgyrda gatnaşyjylar aýdym, dessan ýa-da goşgular bilen çykyş etdiler. Jemleýji tapgyrda bolsa olar dabaraly saçak taýýarlap, milli naharlaryň taýýarlanylyşyny görkezdiler.
Netijeler boýunça:
-
üçünji orun — Ahal, Lebap welaýatlaryndan we Arkadag şäherinden gelen gatnaşyjylara;
-
ikinji orun — Balkan welaýatyndan we Aşgabat şäherinden gatnaşyjylara;
-
birinji orun — Mary welaýatynyň wekillerine;
-
Baş baýrak — Daşoguz welaýatynyň gatnaşygyna berildi.
Ýeňijiler we baýrak alanlar hormat hatlary hem-de gymmatly sowgatlar bilen sylaglandy.
Bäsleşigiň dabaraly bölegi estrada ýerine ýetirijileriniň aýdym-sazly çykyşlary bilen tamamlandy.
Bäsleşik Türkmenistanyň Merkezi banky, Türkmenistanyň zenanlar birleşiginiň Merkezi geňeşi we Türkmenistanyň kärdeşler arkalaşyklarynyň milli merkezi tarapyndan guraldy. Çäre Parahatçylyk we ynam ýylyna, Türkmenistanyň Garaşsyzlygynyň 34 ýyllygyna, hemişelik bitaraplygyň 30 ýyllygyna, şeýle hem milli manadyň dolanyşyga girizilmeginiň 32 ýyllygyna bagyşlandy.
Şeýle hem okanyň
Blitz