Daşoguz welaýatynda «Galkynyş» milli at üstündäki oýunlar toparynyň halkara derejesinde gazanan nobatdaky ýeňişlerine bagyşlanan dabaraly çäreler uly şatlyk-şowhun bilen geçirildi. Şäheriň Görogly meýdançasynda badalga alan dabaralar Nurmuhammet Andalyp adyndaky döwlet sazly drama teatrynyň artistleriniň täsirli sahnalary bilen utgaşdy.

«Galkynyş» toparynyň agzalary welaýatyň Taryhy we ülkäni öwreniş muzeýinde bolup, halkymyzyň gadymy taryhyndan we medeni mirasymyzdan habar berýän gymmatlyklar bilen tanyşdylar. Esasy dabaralar «Türkmeniň ak öýi» binasynda dowam etdirildi. Çykyşlarda ahalteke bedewleriniň türkmen halkynyň mertliginiň, gözelliginiň we sarsmaz wepalylygyň nyşanydygy, olaryň dünýä medeniýetine goşan goşandy barada durlup geçildi.

Soňra toparyň türgenleri «Türkmeniň ak öýi» binasynyň giň meýdançasynda özleriniň täsin we çylşyrymly at üstündäki oýunlaryny görkezdiler. Medeni maksatnamanyň ahyrynda köpçülikleýin dabaralar üçin niýetlenen ýörite desgada agzaçar sadakasy berildi. Ýatladyp geçsek, 2026-njy ýylyň ýanwarynda Monte-Karlo şäherinde geçirilen 48-nji halkara sirk festiwalynda «Galkynyş» topary Bütindünýä sirk federasiýasynyň we Ýewropa Sirk assosiasiýasynyň ýörite şahadatnamalaryna mynasyp bolupdy. Şol şatlykly wakanyň hormatyna guralýan dabaralar ýurdumyzyň beýleki welaýatlarynda hem dowam edýär.