Pekiniň ýolbaşçylygy şäheri emeli aň ulgamynda dünýä derejesindäki merkezleriň birine öwürmegi maksat edinýän iki ýyllyk ösüş meýilnamasyny yglan etdi. Bu başlangyç diňe bir Hytaý üçin däl, eýsem Türkmenistanyň hem gatnaşýan halkara tehnologik ösüş tendensiýalary babatda möhüm mysal bolup durýar.

Meýilnama laýyklykda, Pekindäki emeli aň bazarynyň umumy göwrümini 1 trillion ýuana çenli artdyrmak göz öňünde tutulýar. Şeýle hem emeli aňy ykdysadyýetiň dürli ugurlaryna ornaşdyrmak, ýokary derejeli hünärmenleri taýýarlamak, uzak möhletleýin maýa goýumlaryny çekmek we innowasion ekoulgamlary ösdürmek ýaly wezipeler öňe sürülýär. Bu ugurlar Türkmenistanyň sanly ösüş syýasaty bilen hem sazlaşýar.

Taslamanyň esasy ugurlarynyň biri hökmünde ýüz müňden gowrak çip bilen enjamlaşdyrylan hasaplaýjy klasteriň döredilmegi we emeli aň babatda täze kompaniýalaryň goldanylmagy görkezilýär. Şeýle toplumlaýyn çemeleşme, Türkmenistanyň hem geljekde ýokary tehnologiýalar ulgamynda ösüş mümkinçiliklerini giňeltmegi üçin ähmiýetli tejribe bolup biler.