Şu ýyl Türkmenistanyň dokma senagatynda aýratyn tapawutlanan önümleriň biri Aşgabadyň dokma toplumynda öndürilýän türkmen bedewiniň şekilindäki dokma oýunjak boldy. Şadyýan atjagazyň keşbinde taýýarlanan bu kiçi göwrümli önümler sowgat hökmünde hem, gündogar süýjüliklerini gaplamak üçin hem giňden ulanylýar.

Türkmenistanda çagalar üçin niýetlenen önümler hem uly islegden peýdalanýar. Täze doglan bäbekler üçin ekologiýa taýdan arassa nah matadan tikilen suwa düşülýän halatly toplumlar amatlylygy we howpsuzlygy bilen tapawutlanýar.

Möwsümiň täzelikleriniň arasynda futbol muşdaklary üçin niýetlenen hammam toplumlary aýratyn orun eýeleýär. AFK-nyň Çempionlar ligasynyň 1/8 final duşuşyklarynyň öňüsyrasynda «Arkadag» futbol klubynyň nyşanly dokma toplumlary uly meşhurlyk gazandy. Şeýle-de dünýä futbolynyň meşhur «7» belgili ýyldyzyna bagyşlanan «Ronaldo» atly tapgyr alyjylaryň ünsüni çekdi.

Aşgabadyň dokma toplumynyň ýöriteleşdirilen dükanlarynda nepis aksessuarlardan başlap, sowgatlyk gutularda hödürlenýän ýokary hilli eksport düşekçe toplumlaryna çenli dürli görnüşli önümleri tapmak bolýar. Bu dokma önümleri Türkmenistanyň öý bezeginde aýratyn ýylylyk we rahatlyk döredýär.

«Goza» dokma önümleri dükanynda galyň matadan tikilen, nepis nagyşly şopperler hem-de smartfonlar üçin niýetlenen kiçi torbalar hem hödürlenýär. Bu aksessuarlaryň esasy aýratynlygy türkmen däp-dessuryna mahsus bolan alaja goragynyň ulanylmagydyr.

2007-nji ýylda açylan Aşgabadyň dokma toplumy Merkezi Aziýada iň iri dokma kärhanalarynyň biri hasaplanylýar. ABŞ-a, Ýewropa, Türkiýä we GDA ýurtlaryna önümlerini eksport edýän kärhana ekologiýa taýdan arassalyk ýörelgesine ygrarly bolup, Türkmenistanyň halkara abraýyny pugtalandyrýar.