Türkmenistanyň oba hojalyk ulgamynda 2025-nji ýylyň ýanwar aýynyň jemleri boýunça oňyn ösüş gazanyldy. 6-njy fewralda sanly ulgam arkaly geçirilen Ministrler Kabinetiniň mejlisinde Prezident Serdar Berdimuhamedow oba hojalyk pudagynda alnyp barylýan işleriň netijelerini diňledi.

Wise-premýer T.Atahallyýew welaýatlarda möwsümleýin oba hojalyk işleriniň barşy hem-de önümçilik görkezijileri barada giňişleýin hasabat berdi. Hasabata görä, geçen ýylyň degişli döwri bilen deňeşdirilende, Türkmenistanyň oba hojalygy boýunça önümçiligiň ösüş depgini 109,3 göterime deň boldy.

Türkmenistanyň oba hojalyk ulgamyna degişli ministrliklerde, döwlet komitetlerinde, konsernlerde we döwlet birleşiklerinde oňyn ösüş depginleri hasaba alyndy. Şeýle-de, maýa goýum serişdelerini özleşdirmegiň meýilnamasynyň 107,9 göterim ýerine ýetirilmegi oba hojalyk pudagynyň maddy-enjamlaýyn binýadynyň berkidilýändigini görkezýär.

Häzirki wagtda Türkmenistanyň ähli sebitlerinde möwsümleýin işler dowam edýär. Bugdaý ekinlerine ideg etmek, gowaça we beýleki ekinler üçin meýdanlary hem-de tohumlary taýýarlamak, suw howdanlaryna suw toplamak, suwaryş ulgamlaryny kämilleşdirmek, şor suw akabalaryny arassalamak we suw hojalyk desgalaryny abatlamak boýunça degişli çäreler alnyp barylýar.

Prezident Serdar Berdimuhamedow hasabaty jemläp, Türkmenistanyň oba hojalyk pudagyny toplumlaýyn ösdürmegi dowam etdirmegi, onuň tehniki mümkinçiliklerini güýçlendirmegi hem-de ähli meýdan işleriniň agrotehniki talaplara laýyklykda, bellenen möhletlerde geçirilmegine berk gözegçilik etmegi tabşyrdy.