Täjigistan Respublikasynyň paýtagty Duşenbe şäherinde Germaniýanyň halkara hyzmatdaşlyk boýunça jemgyýetiniň (GIZ) «Ýaşyl Merkezi Aziýa II» maksatnamasynyň çäklerinde guralan «Merkezi Aziýanyň zenan parlamentarileri — «Durnukly ösüş üçin suw» gün tertibini ilerletmekde öňdebaryjylyk» atly halkara forumy geçirildi. Bu abraýly sebitara maslahatda Türkmenistanyň Mejlisiniň wekilleri ýurdumyzyň parlament diplomatiýasyny we ekologiýa syýasatyny üstünlikli goradylar.

Geçirilen bu forumyň esasy maksady Merkezi Aziýa sebitinde durnukly ösüşi gazanmak, durnukly suw diplomatiýasyny kemala getirmek we howanyň global üýtgemegine garşy netijeli göreşmek boýunça amallarda zenan parlamentarileriň ornyny pugtalandyrmakdan ybarat boldy. Maslahat ýokary derejeli gepleşikler, iň gowy kanunçylyk we institusional tejribeleri alyşmak hem-de Birleşen Milletler Guramasynyň Durnukly ösüş maksatlaryna (DÖM) ýetmekde milli kanunçylyk ulgamlaryny has-da kämilleşdirmek üçin utgaşdyrylan täze çemeleşmeleri işläp düzmekde netijeli platforma öwrüldi.

Forumyň dowamynda Mejlisiň wekilleri öz çykyşlarynda ekologiýa meselelerini we suw syýasatyny durmuşa geçirmekde zenanlaryň eýeleýän ornunyň ähmiýetini aýratyn bellediler. Şeýle hem Türkmenistanda azyk howpsuzlygyny doly üpjün etmek, ýer we suw serişdelerinden tygşytly hem-de netijeli peýdalanmak, daşky gurşawy goramak boýunça alnyp barylýan köpugurly döwlet maksatnamalary barada giňişleýin maglumat berdiler. Bu ugurdaky kanun çykaryjylyk işlerinde türkmen zenanlarynyň işjeň gatnaşýandygy aýratyn nygtaldy.

Türkmen wekilleri öz çykyşlarynda sebit ýurtlarynyň arasynda parahatçylykly we dostlukly gatnaşyklary berkitmekde, özara ynanyşmagy hem-de hyzmatdaşlygy pugtalandurmakda ekologik diplomatiýanyň iň oňyn guraldygyny subut etdiler. Şunda zenanlaryň jemgyýetdäki we döwlet dolandyryşyndaky ornuny ýokarlandyrmagyň hem-de olaryň ýolbaşçylyk ukybyny ösdürmegiň ähmiýeti bellenildi. Maslahata gatnaşyjylar Türkmenistanyň ekologiýa we suw meseleleri boýunça öňe sürýän halkara başlangyçlaryna ýokary baha berdiler.