Koreýa Respublikasynyň Seul şäherinde ýerleşýän meşhur Hankuk daşary ýurt bilimleri uniwersitetinde (HUFS) Türkmenistanyň Garaşsyzlygynyň 35 ýyllygyna we 2026-njy «Garaşsyz, baky Bitarap Türkmenistan — bedew batly at-myradyň mekany» ýylyna bagyşlanan dabaraly halkara maslahat geçirildi. Türkmenistanyň Koreýadaky ilçihanasynyň guramagynda geçen bu çäre iki ýurduň arasyndaky medeni-ynsanperwer we diplomatik gatnaşyklaryň täze belentliklere çykýandygynyň aýdyň subutnamasyna öwrüldi.

Maslahata Koreýa Respublikasynyň döwlet edaralarynyň ýolbaşçylary, Merkezi Aziýa ýurtlarynyň diplomatik wekilleri, HUFS uniwersitetiniň professor-mugallymlary we talyplary, şol sanda bu ýurtda bilim alýan türkmen ýaşlary gatnaşdylar. Açylyş dabarasynda Türkmenistanyň ilçisi Begenç Durdyýew Garaşsyzlyk ýyllarynda gazanylan ykdysady we syýasy ösüşler, şeýle hem Bitaraplyk syýasatynyň ähmiýeti barada çykyş etdi. Şeýle hem ol gatnaşyjylary Prezident Serdar Berdimuhamedowyň «Türkmenistanyň Bitaraplygy – parahatçylygyň we ynanyşmagyň aýdyň ýoly» atly täze kitaby bilen tanyşdyrdy.

Çykyşlarda 2026-njy ýylyň şygarynyň mazmuny we onuň Koreýa medeniýetindäki «Byeong-o» (Otly at) ýyly bilen gabat gelmeginiň aýratyn simwoliki ähmiýete eýedigi bellenildi. «Merkezi Aziýa-Koreýa Respublikasy» hyzmatdaşlyk forumynyň Sekretariatynyň ýerine ýetiriji direktory jenap Ri Jon-kuk Türkmenistanyň parahatçylyk söýüji syýasatyna ýokary baha berdi. Ol şu ýylyň sentýabr aýynda geçirilmegi meýilleşdirilýän ilkinji «Merkezi Aziýa – Koreýa Respublikasy» sammitiniň ikitaraplaýyn gatnaşyklarda taryhy pursat boljakdygyny nygtady.

Halkara maslahatyň çäklerinde türkmen milli amaly-haşam sungatynyň sergisi hem guralyp, onda nepis halylar we milli şaý-sepler görkezildi. Maslahatyň ahyrynda myhmanlara türkmen milli tagamlary hödürlenildi, bu bolsa gatnaşyjylara türkmen halkynyň myhmansöýerlik däpleri bilen ýakyndan tanyşmaga mümkinçilik berdi. Bu çäre diňe bir ylmy maslahat bolman, eýsem iki halkyň medeniýetleriniň ýakynlaşmagyna we özara düşünişmegiň berkemegine uly goşant goşdy.