Ýanwar aýynda Türkmenistanyň daşary syýasat ugrunda alyp barýan işleri ýokary depginde dowam etdi. Bu döwürde 30 daşary ýurt wekiliýeti Türkmenistana sapar bilen geldi, şol bir wagtyň özünde 65 türkmen wekiliýeti daşary ýurtlara ugradyldy. Bu maglumatlar 6-njy fewralda geçirilen Hökümet mejlisinde wise-premýer, daşary işler ministri Raşid Meredowyň hasabatynda beýan edildi.

Hasabatda bellenilişi ýaly, görkezilen döwürde Türkmenistan daşary ýurt döwletleri we halkara guramalary bilen bilelikde 116 resmi gepleşigi we duşuşygy gurady. Bu çäreler ýurduň halkara hyzmatdaşlygyny giňeltmekde möhüm orun eýeleýär.

Şeýle hem ýanwar aýynda Türkmenistanyň halkara gatnaşyklarynyň şertnama-hukuk binýady 12 resminama bilen baýlaşdy. Mundan başga-da, Awstriýa Respublikasy, Hindistan, Marokko Patyşalygy hem-de Russiýa Federasiýasy bilen DIM-leriň arasynda syýasy maslahatlaşmalar geçirildi.

Daşary syýasatyň möhüm ugurlarynyň biri hökmünde Türkmenistanda daşary ýurtlaryň diplomatik wekilhanalarynyň işiniň ösdürilýändigi nygtaldy. Şu nukdaýnazardan, ýanwar aýynda Çad Respublikasynyň Türkmenistandaky täze bellenilen ilçisinden ynanç hatlary kabul edildi.

Hasabaty diňläp, Prezident Serdar Berdimuhamedow Türkmenistanyň döwletler we abraýly halkara guramalary bilen hyzmatdaşlygyny mundan beýläk-de pugtalandyrmagy, şeýle-de ýurtda geçiriljek halkara derejeli çäreleriň ýokary guramaçylyk derejesinde üpjün edilmegini tabşyrdy.