Şu gün Prezident Serdar Berdimuhamedow Mary welaýatyna iş saparyny gurap, möwsümleýin oba hojalyk işleriniň alnyp barlyşy hem-de Oba milli maksatnamasynyň durmuşa geçirilişi bilen tanyşdy. Saparyň çäginde döwlet Baştutany welaýatda oba hojalyk toplumynyň ýolbaşçylary bilen iş maslahatyny geçirdi. Bu barada «Watan» habarlar gepleşigi maglumat berdi.

Maslahatda oba hojalyk pudagynyň ösdürilişi, bu ugurdaky ylmy-barlag işleriniň häzirki ýagdaýy ýaly meseleler ara alnyp maslahatlaşyldy. Ministrler Kabinetiniň Başlygynyň orunbasary T. Atahallyýew häzirki wagtda däneçilik, ekerançylyk we pagtaçylyk institutlarynda alnyp barylýan işler, aýratyn-da, ekerançylygy we tohumçylygy ylmy esasda kämilleşdirmek boýunça görülýän çäreler dogrusynda hasabat berdi.

Hasabaty diňläp, Prezident ylmy-barlag institutlarynda alnyp barylýan işleriň oba hojalygyny diwersifikasiýa ýolunda ösdürmekde möhüm orun tutýandygyny belläp, degişli tabşyryklary berdi.

Maslahatyň dowamynda Mary welaýatynyň häkimi D. Annaberdiýew we beýleki degişli ýolbaşçylar ýerleriň hasyllylygyny ýokarlandyrmak hem-de dürli ekinleriň täze görnüşlerini synagdan geçirmek boýunça alnyp barylýan toplumlaýyn ylmy işler barada maglumat berdiler.

Döwlet Baştutany seleksiýa we tohumçylyk ugurlarynda alnyp barylýan ylmy işleriň hiline aýratyn ähmiýet berilmelidigini, dünýäniň öňdebaryjy tejribesiniň we häzirki zaman agrotehnologiýalarynyň içgin öwrenilmelidigini nygtady. Şeýle hem alymlaryň hünär derejesini yzygiderli ýokary götermek zerurdygyny belläp, degişli ýolbaşçylara anyk tabşyryklary berdi we maslahaty jemledi.