Türkmenistanda GDA agza döwletleriň arasynda geçiriljek «Ganatly bedew: güýç we nepislik» atly döwletara tele-filmler bäsleşigi yglan edildi. Bu başlangyç Türkmenistanyň Telewideniýe, radiogepleşikler we kinematografiýa baradaky döwlet komiteti hem-de «Türkmen atlary» döwlet birleşigi tarapyndan bilelikde guralýar.

Bäsleşik Türkmenistanda we GDA giňişliginde atçylygyň taryhyny, atly medeniýeti wagyz etmäge, bedewi halklaryň medeni mirasynyň aýrylmaz bölegi hökmünde giňden tanatmaga hem-de dokumental telekinematografiýany ösdürmäge gönükdirilendir.

Bäsleşige GDA ýurtlarynyň döwlet we hususy telekompaniýalary, garaşsyz prodýuserler, awtorlar we döredijilik toparlary gatnaşyp bilerler. Her bir gatnaşyjy Türkmenistanda geçirilýän bäsleşige iki eserden köp bolmadyk iş hödürläp biler. 2024-nji ýyldan öň döredilmedik, dowamlylygy 15 minutdan 30 minuta çenli bolan dokumental, dokumental-publisistik filmler hem-de telewizion oçerkler kabul edilýär. Eserler rus ýa-da iňlis dillerinde subtitrler bilen üpjün edilmelidir.

Filmleriň tematikasy atçylyk taryhyny, at tohumlarynyň ösüşini, GDA halklarynyň medeniýetinde atyň eýeleýän ornuny, bedewiň gözelligini we nepisligini, şeýle hem atçylyk sportuny öz içine alýar. Işlere mazmunyň tema laýyklygy, çeperçilik we režissýorlyk derejesi, operatorçylyk ussatlygy, döredijilik özboluşlylygy hem-de medeni ähmiýeti boýunça baha berler.

Ýeňijiler Türkmenistanda «Iň gowy tele-film», «Atçylygyň taryhy barada iň gowy film», «Atçylyk sporty baradaky iň gowy film», «Bedewiň keşbini çeperçilik bilen beýan edendigi üçin» we «Eminleriň baýragy» ugurlary boýunça kesgitlener. Baýrak gowşurylyş dabarasy festiwalyň ýapylyşynda geçiriler.

Bu bäsleşik Türkmenistanda GDA döwletleriniň arasynda medeni-ynsanperwer hyzmatdaşlygy pugtalandyrmak maksady bilen täjirçilik däl esasda amala aşyrylýar.