22-nji aprelde Türkmenistanyň bilim ministri J. Gurbangeldiýew Malaýziýanyň ilçisi Mohd Suhaými Bin Ahmad Tajuddin we «Petronas Çarigali (Türkmenistan)» kompaniýasynyň wekiliýeti bilen duşuşdy. Gepleşikleriň özenini nebit-gaz pudagy üçin döwrebap bilimli hünärmenleri taýýarlamakda özara gatnaşyklary giňeltmek meselesi düzdi. Taraplar ýurdumyzyň ýokary we orta hünär okuw mekdepleriniň Malaýziýanyň ylmy-barlag merkezleri hem-de «Petronas» kompaniýasynyň bilim edaralary bilen göni gatnaşyklaryny ýola goýmagyň mümkinçiliklerini seljerdiler.

Dünýäniň 100-den gowrak döwletinde tejribesi bolan «Petronas» kompaniýasynyň wekilleri özleriniň hyzmatdaş ýurtlarda adam maýasyny ösdürmäge uly ähmiýet berýändikleri barada aýtdylar. Duşuşykda kompaniýanyň hünär-tehniki taýýarlyk we gysga möhletli hünär kämilleşdiriş okuwlaryny öz içine alýan bilim maksatnamalary barada giňişleýin tanyşdyrylyş dabarasy boldy. Bu başlangyçlar Türkmenistanyň energetika pudagynyň hünärmenler binýadyny has-da berkitmäge ýardam berer.

Duşuşygyň dowamynda Petronas Tehnologiýa uniwersiteti, «Alam» deňiz bilimi akademiýasy we «Petronas Leadership Centre» ýaly abraýly düzümler bilen hyzmatdaşlygyň amaly ugurlary ara alnyp maslahatlaşyldy. Şeýle-de, «Yayasan Petronas» we «Petrosains» ýaly bilim merkezleriniň mümkinçiliklerinden peýdalanmak meselesine garaldy. Bu halkara guramalar bilen ýola goýuljak gatnaşyklar türkmen mugallymlaryna we talyplaryna iň täze tehnologiýalary we ylmy usullary öwrenmäge giň ýol açar.

Türkmenistan bilen «Petronas» kompaniýasynyň arasyndaky hyzmatdaşlyk köp ýyllaryň dowamynda netijeli häsiýete eýe bolup gelýär. Kompaniýanyň hödürleýän talyp hakly ýerleriniň hasabyna ýurdumyzyň ýaşlary Malaýziýanyň Tehnologiýa uniwersitetinde yzygiderli bilim alýarlar. Mundan başga-da, Ýagşygeldi Kakaýew adyndaky Halkara nebit we gaz uniwersiteti bilen baglaşylan Ähtnamanyň çäklerinde her ýyl amala aşyrylýan hünär kämilleşdiriş okuwlary pudagyň bilim derejesiniň dünýä ölçeglerine laýyk gelmegini üpjün edýär.