Ýewropada Howpsuzlyk we Hyzmatdaşlyk Guramasynyň (ÝHHG) Aşgabatdaky Merkeziniň binasynda metbugat gulluklarynyň işgärleri üçin gepleşikler geçirmek, köpçülik bilen işleşmek hem-de resmi çykyşlary taýýarlamagyň döwrebap başarnyklary boýunça hünär kämilleşdiriş okuw maslahaty geçirildi. Türkmenistanyň Döwlet migrasiýa gullugynyň resmi saýtynda habar berilişi ýaly, bu çärä edaranyň degişli hünärmenleri hem işjeň gatnaşdylar.

Guralan okuw maslahatynyň esasy maksady metbugat we jemgyýetçilik bilen aragatnaşyk (PR) gulluklarynyň işgärleriniň hünär taýýarlygyny ýokarlandyrmakdan, olary dünýäniň öňdebaryjy tejribeleri, strategik meýilleşdiriş mehanizmleri hem-de köpçülikleýin habar beriş serişdeleri (KHS) bilen özara gatnaşyklaryň täsirli usullary bilen tanyşdyrmakdan ybarat boldy. Halkara bilermenleriň gatnaşmagynda geçirilen amaly sapaklarda resmi beýanatlary ýazmagyň logiki esaslaryna we köpçüligiň öňünde çykyş etmegi ulgamlaşdyrmaga aýratyn üns berildi.

Duşuşygyň dowamynda taraplar adatdan daşary ýa-da dürli kynçylykly ýagdaýlarda metbugat gulluklarynyň döwrebap iş gurallaryny ulanmagyň, krizis kommunikasiýalaryny dolandyrmagyň we maglumat akymyny utgaşdyrmagyň ýollaryny giňişleýin ara alyp maslahatlaşdylar. Pikir alyşmalaryň çäklerinde geçirilen ýörite hünär sapaklary ýokary hilli press-relizleri, habarlary we resmi düşündirişleri taýýarlamagyň inçe syrlaryna bagyşlandy.