Şu gün Türkmenistanyň Ýaponiýadaky Adatdan daşary we Doly ygtyýarly ilçisi A. Baýramowyň Ýaponiýanyň Halkara hyzmatdaşlyk agentliginiň (JICA) Prezidenti Akihiko Tanaka bilen duşuşygy geçirildi. Türkmenistanyň Daşary işler ministrliginiň resmi saýtynda habar berlişi ýaly, duşuşygyň barşynda Türkmenistanyň Prezidentiniň hem-de Türkmenistanyň Halk Maslahatynyň Başlygynyň türkmen-ýapon gatnaşyklaryny yzygiderli pugtalandyrmaga gönükdirilen alyp barýan parahatçylykly we netijeli syýasatyna gaty ýokary baha berildi. Hususan-da, 2025-nji ýylyň aprel we dekabr aýlarynda Tokioda Türkmenistanyň Prezidentiniň Ýaponiýanyň Imperatory Naruhito we Ýaponiýanyň Premýer-ministri Sanae Takaiçi bilen geçiren dostlukly hem-de ýokary netijeli gepleşikleriniň ikiçäk hyzmatdaşlygy täze derejä çykarmakdaky taryhy ähmiýeti bellenildi.

Duşuşykda taraplar Türkmenistan bilen JICA-nyň arasyndaky häzirki amala aşyrylýan tehniki taslamalary we hyzmatdaşlygyň geljekki mümkinçiliklerini giňişleýin ara alyp maslahatlaşdylar. Bu ugurda türkmen hünärmenleri üçin okuw we hünär derejesini ýokarlandyrmak maksatnamalaryny işläp düzmek, wodorod energiýasy ulgamynda hünärmenleri taýýarlamak boýunça Sukuba uniwersiteti bilen gatnaşyklary berkitmek hem-de «Bir oba, bir önüm» başlangyjyny işjeň öňe sürmek meselelerine aýratyn üns berildi.

Şeýle-de gepleşikleriň çäklerinde sanlylaşdyrmak, saglygy goraýyş, durnukly ösüş we adam kapitalyny ösdürmek ýaly möhüm ugurlarda hyzmatdaşlygy giňeltmek bellenildi. Taraplar emeli aň, sanly özgertme, ykdysady, senagat hem-de tehnologiýa ulgamlarynda tejribe alyşmagy, şonuň bilen birge medeni we syýahatçylyk gatnaşyklaryny täze taslamalar arkaly has-da baýlaşdyrmak barada ylalaşdylar.