Şu gün Türkiýe Respublikasynyň Aşgabatdaky ilçihanasynyň Medeniýet merkezinde Türkiýäniň iň täze taryhyndaky şanly senelerden biri bolan Demokratiýa we milli agzybirlik gününiň 10 ýyllygyna bagyşlanan dabaraly çäre geçirildi. Çäräniň dowamynda Türkiýäniň Türkmenistandaky Adatdan daşary we Doly ygtyýarly ilçisi Ahmet Demirok gatnaşyjylaryň öňünde çykyş etdi. Ilçi mundan on ýyl ozal (2016-njy ýylyň 15-nji iýulynda) Türkiýede guralan döwlet agdaralyşygyna synanyşygyň öňüniň türk halkynyň we gahrymanlarynyň belent agzybirligi hem-de durnuklylygy bilen alynandygyny mälim etdi.

Ilçi Ahmet Demirok öz çykyşynda iki doganlyk ýurduň arasyndaky köp ýyllyk, dostlukly we strategetik hyzmatdaşlyga ýokary baha berip, türkmen tarapyna aýratyn minnetdarlyk bildirdi. Ol türk halkynyň adyndan Türkmenistanyň ýolbaşçylaryna — türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa we Türkmenistanyň Prezidenti Serdar Berdimuhamedowa hoşniýetli goldawlary we doganlyk hemaýatlary üçin çuňňur sagbolsun aýtdy.

Dabaranyň resmi böleginiň çäklerinde sebit müftüsi tarapyndan taryhy wakalarda wepat bolan gahrymanlaryň hatyrasyna aýat-töwirler okaldy. Çykyşynyň ahyrynda ilçi 2016-njy ýylyň wakalarynda wepat bolan şehitleriň ýadygärligini hormat bilen hatyralady we weteranlara berk jan saglygyny hem-de abadançylyk diledi. Dabara tamamlanandan soňra, myhmanlar ýörite guralan we şol taryhy pursatlary beýan edýän fotosergi bilen ýakyndan tanyşdylar.