Pekin şäherinde Türkmen-hytaý işewürlik forumynyň we sergisiniň tanyşdyrylyş çäresi geçirildi. Bu forum we sergi 28–30-njy aprel aralygynda Türkmenistanda, Türkmenistanyň Söwda-senagat edarasynyň binasynda geçiriler.

 

Çäre CODA, «Talvas Ýoly» ýapyk görnüşli paýdarlar jemgyýeti, Oguz Forum Expo bölümi hem-de Türkmenistanyň Söwda-senagat edarasy tarapyndan, Türkmenistanyň Hytaý Halk Respublikasyndaky ilçihanasynyň goldaw bermeginde guraldy.

 

Tanyşdyrylyş çäresine maglumat tehnologiýalary, ýokary tehnologiýalar, energetika, oba hojalygy, lukmançylyk, maşyn gurluşygy, metallurgiýa, gurluşyk we logistika ýaly dürli ugurlarda iş alyp barýan hytaý kompaniýalarynyň 250-den gowrak wekilleri gatnaşdy. Şeýle hem, oňa Türkmenistanyň resmi wekilleri, şol sanda ýurduň Hytaýdaky Adatdan daşary we Doly ygtyýarly ilçisi gatnaşdy.

 

Çäräniň esasy maksady geljekki forumyň mümkinçiliklerini giňden tanyşdyrmak bolup, ol türkmen we hytaý kompaniýalarynyň arasynda göni işewür gatnaşyklary ýola goýmak, täze bazarlara çykmak hem-de bilelikdäki maýa goýum taslamalaryny durmuşa geçirmek üçin amatly şertleri döretmäge gönükdirilendir. Gatnaşyjylar önümleri tanyşdyrmak, eksport şertnamalaryny baglaşmak we häzirki zaman tehnologiýalaryny ornaşdyrmak mümkinçilikleri bilen tanyşdylar.

 

Tanyşdyrylyş çäresiniň netijesinde hytaý kompaniýalary bu foruma we sergä gatnaşmaga uly gyzyklanma bildirdiler. Bu bolsa gepleşikleriň geçirilmegine we täze bilelikdäki taslamalaryň ýola goýulmagyna giň mümkinçilikleri açýar.

 

Forumyň Türkmenistan bilen Hytaýyň arasynda işewür gatnaşyklary berkitmekde, şeýle hem iki ýurduň işewür toparlarynyň arasynda uzak möhletleýin hyzmatdaşlygy ösdürmekde möhüm meýdança bolmagyna garaşylýar.

 

Gatnaşmak üçin hasaba alyş eýýäm turkmenchina.com saýtynda açykdyr. Kompaniýalar öňünden ýer belläp, geljekki hyzmatdaşlar bilen duşuşyklara taýýarlanyp bilerler.