Türkmenistanyň Telekommunikasiýalar we informatika institutynyň talyplary üçin Rumyniýanyň Kluj-Napoka şäheriniň Tehniki uniwersitetinde guralan tomusky tejribelik sapary şowly dowam edýär. Erasmus halkara maksatnamasynyň çäklerinde amala aşyrylýan bu taslama ýokary okuw mekdebiniň 15 talybyny we olara ýolbaşçylyk edýän iki sany mugallymy bir ýere jemledi. Iki taraplaýyn bilim hyzmatdaşlygynyň has-da berkeýändigini görkezýän bu sapar eýýäm üçünji gezek guralyp, taraplaryň özara gatnaşyklara yzygiderli we strategik taýdan çemeleşýändigini subut edýär.

Kluj-Napoka şäheriniň Tehniki uniwersitetiniň wekilleri bu hyzmatdaşlygyň iki tarap üçin hem örän ähmiýetlidigini aýratyn belleýärler. Programmanyň hünärmenleriniň pikiriçe, şeýle tejribelikler talyplara we mugallymlara diňe bir tanyşlyk däl, eýsem döwrebap önümçilik proseslerini, täze tehnologiki innowasiýalary hem-de halkara iş tejribesini ýerinde öwrenmäge ajaýyp mümkinçilik berýär. Bu bolsa talyplaryň Aşgabatda alan nazary bilimlerini iş ýüzünde we halkara derejede barlap görmeklerine ýardam edýär.

Ýewropaly hünärmenler Aşgabatda ýerleşýän bu abraýly institut bilen alnyp barylýan ygtybarly we dowamly hyzmatdaşlyga örän ýokary baha berýärler. Geljekde hem gatnaşyklaryň gerimini has-da giňeltmäge we Türkmenistandan has köp sanda talyplary, professor-mugallymlary we alymlary öz uniwersitetlerinde garşylamaga garaşýandyklaryny uly höwes bilen mälim edýärler.

 

Kemal WELMÄMMEDOW, Türkmenistanyň Daşary işler ministrliginiň Halkara gatnaşyklary institutynyň talyby