ÝHHG-nyň Aşgabatdaky merkeziniň başlangyjy bilen multimedia žurnalistikasynyň döwrebap gurallaryny özleşdirmek boýunça üç günlük okuw maslahaty geçirildi. Aprel aýynyň 21-23-i aralygynda guralan bu çäre, milli media wekilleriniň hünär derejesini ýokarlandyrmaga we redaksiýalaryň işine innowasion tehnologiýalary ornaşdyrmaga gönükdirildi. Gatnaşyjylar maglumatlary işläp taýýarlamagyň täze usullaryny, şol sanda neýron ulgamlary we uly dil modelleri (LLM) bilen işlemegiň inçe syrlaryny öwrendiler.

Okuw maksatnamasynyň çäklerinde maglumatlary wizualizasiýa etmek we interaktiw infografikalar döretmek meselelerine aýratyn üns berildi. Halkara hünärmenler häzirki zaman okyjysynyň maglumat sarp ediş medeniýetiniň üýtgeýşi barada durlup geçip, çylşyrymly temalary ýönekeý we täsirli dilde ýetirmegiň usuly bolan "storitelling" tehnologiýasyny düşündirdiler. Şeýle-de, sanly gurallaryň kömegi bilen dizaýn ukyplary bolmazdan professional derejeli wizual mazmun döretmegiň amaly usullary görkezildi.

Maslahatyň iň döwrebap bölümleriniň biri emeli aňyň žurnalistleriň gündelik işine ornaşdyrylmagy bilen bagly boldy. Hünärmenler dil modellerini takyk sazlamagyň (kontekst-inžiniring) ýollaryny görkezip, bu tehnologiýanyň tekstleri redaktirlemek we maglumatlary ilkinji işlenişden geçirmek ýaly amallary awtomatlaşdyrmaga mümkinçilik berýändigini nygtadylar. Bu bolsa döredijilik işgärlerine seljerme we reportaž ýaly has çylşyrymly wezipelere wagt bölmäge şert döredýär.

Okuwyň jemleýji tapgyrynda ykjam žurnalistika — smartfonlaryň kömegi bilen ýokary hilli foto we wideo mazmun taýýarlamagyň tehniki aýratynlyklary öwredildi. Üç günüň dowamynda alnan nazary bilimler amaly sessiýalarda berkidilip, her bir gatnaşyjynyň özbaşdak multimedia taslamalary seljerildi. Çäre halkara derejeli hünär şahadatnamalarynyň gowşurylmagy bilen tamamlandy.