Türkmenistanly Jahan Saryýewa Hytaýyň Lançjou ulag uniwersitetinde bilim alyp, şol ýokary okuw mekdebinde hytaý dili mugallymlygyna çenli abraýly ýoly geçmegi başardy. Ol häzirki wagtda bu uniwersitetde hytaý dilini daşary ýurt dili hökmünde okatmak boýunça resmi hünär şahadatnamasyny alan ýeke-täk daşary ýurtly hünärmen bolup durýar. Onuň bu üstünligi türkmen ýaşlarynyň halkara derejesinde nähili ýokary sebitlere ýetip biljekdiginiň aýdyň mysalydyr.

Jahan Saryýewanyň Hytaý bilen tanyşlygy 2008-nji ýylda, Lançjou ulag uniwersitetine okuwa giren ilkinji on iki sany türkmen talybynyň biri bolan wagtyndan başlandy. Hytaýyň gadymy medeniýetine, Konfusiýniň pelsepesine we Beýik Hytaý diwaryna bolan gyzyklanmasy ony bu uzak ýola atlandyrdy. Şondan bäri geçen ýyllaryň dowamynda diňe bir Jahan däl, eýsem bu uniwersiteti Türkmenistandan 200-den gowrak uçurym tamamlap, dürli ulgamlarda zähmet çekip gelýärler.

2019-njy ýyldan bäri Jahan Saryýewa uniwersitetiň halkara bilim institutynda mugallymçylyk we dolandyryş işlerini alyp barýar. Köp dilli bolmagy oňa dünýäniň dürli künjeklerinden gelen talyplar bilen dilleşmäge mümkinçilik berýär: ol Merkezi Aziýaly we Russiýaly talyplar bilen rus dilinde, Ýewropadan we Afrikadan gelen ýaşlar bilen bolsa iňlis dilinde erkin söhbetdeş bolýar. «Sinhua» agentligine beren interwýusynda ol: «Dürli dilleri bilmegim we medeniýetlere düşünmegim maňa dünýä bilen aragatnaşyk köprülerini gurmaga ýardam edýär» diýip, öz işiniň ähmiýetini nygtady.

Onuň hyzmatlary diňe bir uniwersitet derejesinde däl, eýsem sebit derejesinde hem ykrar edildi. 2022-nji ýylda Jahan Gansu prowinsiýasynyň hökümetiniň «Dunhuan» baýragyna mynasyp boldy. Bu abraýly sylag sebitiň ylmy-bilim we hünärmen taýýarlamak ulgamyna goşant goşan iň oňat daşary ýurtly hünärmenlere berilýär. Mundan başga-da, Jahan «Daşary ýurtly hünärmenleriň kitap öýüniň» ýanyndaky kitap söýüjiler klubyna ýolbaşçylyk edip, medeniýetleriň ýakynlaşmagyna we intellektual gatnaşyklaryň ösmegine hyzmat edýär.