Türkmenistanyň Demokratik partiýasynyň başlygy Ata Serdarowyň ýolbaşçylygyndaky resmi wekiliýet 10–15-nji maý aralygynda Uganda Respublikasynyň paýtagty Kampala şäherinde iş saparynda boldy. Saparyň esasy maksady Ugandanyň täzeden saýlanan Prezidenti Ýoweri Kaguta Museweniniň wezipesine resmi taýdan girişmegi mynasybetli guralan dabara gatnaşmakdan ybarat boldy. Türkmenistanyň Daşary işler ministrliginiň habar berşi ýaly, bu halkara çäre Kampalanyň meşhur «Kololo» dabaralar meýdançasynda ýokary derejede guraldy.

Dabaraly çäreler tamamlanandan soň, Ugandanyň ýolbaşçysy Ýoweri Kaguta Museweni türkmen wekiliýetini Entebbe şäherindäki prezident köşgünde kabul etdi. Duşuşygyň barşynda Ugandanyň täze saýlanan Prezidentine Türkmenistanyň Prezidenti Serdar Berdimuhamedowyň iberen ýörite minnetdarlyk haty gowşuryldy. Ýokary derejeli hatda dostlukly Uganda döwletiniň dabaraly çäresine çakylyk iberilendigi üçin hoşallyk bildirilýär we ýurduň halkyna parahatçylyk hem-de rowaçlyk baradaky iň gowy arzuwlar beýan edilýär.

Ugandanyň Prezidenti Ýoweri Kaguta Museweni öz gezeginde we Ugandanyň halkynyň adyndan Türkmenistanyň ýokary ýolbaşçylaryna çykarylan hormat we sapar üçin tüýs ýürekden sagbolsun aytdy. Ol Merkezi Aziýanyň ösýän döwletleri, aýratyn-da, Bitarap Türkmenistan bilen syýasy-ykdysady ugurlarda gatnaşyklary ýola goýmaga gyzyklanma bildirýändigini nygtady. Bu duşuşyk iki ýurduň arasyndaky taryhy we diplomatik gatnaşyklaryň täze saýhypasyny açmaga şert döretdi.

Kompala şäherindäki saparyň çäginde Ata Serdarow Ugandanyň häkimiýet başyndaky partiýasynyň baş sekretary Riçard Todwong hem-de bu ýurduň Daşary işler ministrliginiň jogapkär wekilleri bilen birnäçe duşuşyklary geçirdi. Gepleşikleriň dowamynda taraplar özara hyzmatdaşlygyň häzirki ýagdaýyny we geljekde ony dürli ugurlar boýunça ösdürmegiň mümkinçiliklerini ara alyp maslahatlaşdylar. Duşuşyklarda ikitaraplaýyn gatnaşyklary ösdürmekde syýasy partiýalaryň hem-de parlamentara hyzmatdaşlygyň orny barada aýratyn bellenilip geçildi.