Fransiýa Respublikasynyň Grets-Armanwilýe şäherinde Türkmenistanyň medeniýet we sungat ussatlarynyň gatnaşmagynda dabaraly konsert maksatnamasy guraldy. Türkmenistanyň Fransiýadaky ilçihanasy hem-de Medeniýet ministrligi tarapyndan bilelikde guralan bu çäre 2026-njy ýylyň «Garaşsyz, baky Bitarap Türkmenistan —bedew batly at-myradyň mekany» diýen şygaryna bagyşlandy. Medeni çäre iki ýurduň arasyndaky ynsanperwer gatnaşyklary täze basgançaga çykarmakda möhüm ädim boldy.

Dabara ýerli häkimiýet edaralarynyň wekilleri, diplomatik korpusyň agzalary, fransiýaly medeniýet işgärleri hem-de köp sanly ýerli ýaşaýjylar gatnaşdy. Çäräniň dowamynda Türkmenistanyň Fransiýadaky Adatdan daşary we Doly ygtyýarly ilçisi Maksat Çaryýew çykyş edip, medeni diplomatiýanyň halklary ýakynlaşdyrmakdaky we özara düşünişmegi berkitmekdäki ornuna ýokary baha berdi. Şeýle hem ol Grets-Armanwilýe şäheriniň ýolbaşçylaryna we «Fransiýa–Türkmenistan» assosiasiýasynyň ýolbaşçy düzümine goldawlary üçin minnetdarlyk bildirdi.

Konsert maksatnamasynda türkmen halkynyň milli saz sungatyny we häzirki zaman aýdymlaryny öz içine alýan çykyşlar görkezildi. Artistleriň ussatlyk bilen ýerine ýetiren eserleri tomaşaçylary türkmen medeniýetiniň baý dünýäsi bilen tanyşdyrdy. Milli lybaslaryň öwüşgini we joşgunly sazlar dabaranyň belent ruhda geçmegini üpjün edip, fransuz jemgyýetçiliginde uly täsir galdyrdy.

Şeýle-de çäräniň çäklerinde guralan ýörite sergi myhmanlarda aýratyn gyzyklanma döretdi. Sergide türkmen halkynyň gadymy taryhyndan we häzirki zaman ösüşlerinden habar berýän gymmatlyklar, amaly-haşam sungatynyň nusgalary görkezildi. Dabaranyň ahyrynda gatnaşyjylara türkmen milli aşhanasynyň tagamlary hödürlenip, myhmanlar ýurdumyzyň myhmanperwerlik däpleri bilen ýakyndan tanyşmaga mümkinçilik aldylar.