Günbatar Ýewropa sebitinde emele gelen we taryhda görülmedik jokrama yssy howa halk köpçüliginiň ýaşaýyş şertlerine hem-de şäher üpjünçilik ulgamlaryna uly ziyan ýetirýär. Ýewropaly internet ulanyjylary tarapyndan paýlaşylýan wideolarda adamlaryň yssynyň täsiri bilen hatda penjiräniň öňünde ýumurtga gowurýandyklaryny görmek bolýar. Parižiň merkezindäki taryhy öýleriň köpüsinde sowadyjy (kondisioner) ulgamlarynyň ýoklugy sebäpli, ilat wagtlaýynça myhmanhanalara göçmäge mejbur bolýar. «MIR 24» habarlar gullugynyň maglumatyna görä, Fransiýanyň paýtagtynda yssy howa sebäpli ýürek kesellerinden ejir çekýänleriň we aradan çykýanlaryň sany ortaça görkezijilerden 2,5 esse artdy, hassahanalar bolsa näsaglardan doldy.

Häzirki wagtda Ispaniýada, Italiýada we Germaniýada howanyň temperaturasy 40°C-dan geçdi. Şäherleriň köçelerindäki ýol yşyklarynyň (swetoforlaryň) we beýleki köçe enjamlarynyň plastik gurluşlary erep başlady, sebäbi bu tehnikalar beýle aşa gyzgyn howa şertlerine niýetlenip gurulmady. Sinoptikler tiz wagtda täze bir yssy howa tolkunynyň geljekdigini duýdurýarlar.

Bu adatdan daşary gyzgynlyk tebigata, aýratyn-da alp daglarynyň ekologik ýagdaýyna uly zarba urdy. Günbatar Ýewropanyň iň belent nokady bolan 4800 metrlik Monblan dagynyň buzluklary taryhy we rekord derejede eräp başlady. Hünärmenleriň bellemegine görä, bu dag soňky 10 ýylyň içinde eýýäm iki metr kiçeldi. Meteorologlar şu ýylky dowam edýän yssy tolkunlaryň Monblan dagyndaky taryhy buzluklaryň ýitip gitmek we eremek prosesini has-da çaltlandyrjakdygyny çaklaýarlar.