OpenAI kompaniýasynyň ýolbaşçysy Sem Altman tehnologiýalaryň çalt depginler bilen ösmegi netijesinde geljekde ornaşdyrylmagy meýilleşdirilýän ählumumy esasy girdeji (UBI) baradaky garaýyşlaryny üýtgetdi. Mundan ozal raýatlara döwlet tarapyndan yzygiderli berilýän nagt pul tölegleriniň netijelidigine ynanan telekeçi, indi bu modeliniň häzirki zaman ykdysady kynçylyklaryny çözmekde ejiz geljekdigini belleýär. Altmanyň pikiriçe, emeli aňyň zähmet bazaryna edýän täsiri has çuňňur we ulgamlaýyn üýtgeşmeleri talap edýär.

Altmanyň garaýyşlarynyň üýtgemegine 2019-njy ýylda başlanan we 14 million dollar maýa goýlan ylmy barlagyň netijeleri sebäp boldy. Şol taslamanyň çäklerinde pes girdejili raýatlara üç ýylyň dowamynda aýda 1000 dollar möçberinde goldaw berildi. Emma barlagyň netijeleri nagt pul kömeginiň adamlaryň fiziki we ruhy saglygyna, şeýle hem lukmançylyk hyzmatlarynyň hiline garaşylan derejede oňyn täsir etmändigini ýüze çykardy, bu bolsa diňe pul bermek strategiýasynyň ýetersizdigini subut etdi.

Täze ykdysady başlangyç hökmünde Altman "Jemgyýetçilik abadançylygy gaznasyny" döretmegi we raýatlara tehnologik ösüşden gelýän peýdanyň paýyny bermegi teklip edýär. Bu modelde adamlar diňe bir passiw girdeji alman, eýsem emeli aňyň döredýän gymmatlyklaryna umumy eýeçilik hukugyna hem eýe bolarlar. Mundan başga-da, raýatlara hasaplama serişdelerine (kompýuter kuwwatyna) hukuk bermek meselesi hem ara alnyp maslahatlaşylýar, bu bolsa şol serişdeleri satmak ýa-da şahsy maksatlar üçin ulanmak mümkinçiligini döreder.

OpenAI-yň ýolbaşçysy geljekde esasy meselesiniň sanly deňsizligiň öňüni almakdan ybaratdygyny nygtaýar. Onuň sözlerine görä, emeli aňyň mümkinçilikleriniň diňe belli bir baý gatlagyň elinde jemlenmegi jemgyýetde uly bölünişige sebäp bolup biler. Şonuň üçin hem, tehnologiýanyň elýeterliligini hemmetaraplaýyn üpjün etmek we her bir adama täze ykdysady şertlerde öz ornuny tapmaga mümkinçilik bermek döwrüň esasy talaby bolup durýar.