Günbatar Ýewropa sebitinde ýüze çykan dowamly yssy howa tolkuny we guraklyk iň iri suw akabalarynyň ýagdaýyna ýaramaz täsirini ýetirdi. Fransiýanyň çäginden akyp geçýän iň esasy we uzyn suw arteriýalarynyň biri bolan Luaranyň käbir böleklerinde suwuň derejesi çendenaşa peselip, onuň hanasy çägelik meýdançalaryna we kiçigöwrümli çeşmejiklere öwrüldi. Şeýle hem ýurduň beýleki wajyp suw çeşmelerinde we käbir kommunalaryň çäklerindäki derýalarda akymyň doly durandygy barada halkara habar beriş serişdeleri maglumat berýärler.

Howanyň kadadan artyk gyzmagy diňe bir tebigy ulgamlara däl, eýsem sebitiň umumy gidrologik ýagdaýyna hem howp salýar. Tomus möwsüminde ýüze çykan bu tebigy hadysa suw ammarhanalaryndaky we gorhanalaryndaky rezerwleriň taryhy derejede azalmagyna sebäp boldy. Häzirki wagtda hünärmenler ekologik ýagdaýy gözegçilikde saklamak maksady bilen dürli çäreleri meýilleşdirýärler.

Ýüze çykan çylşyrymly ýagdaý sebäpli, ýerli häkimiýetler tarapyndan ilatyň arasynda agyz suwuny we hojalyk maksatly suw serişdelerini tygşytly ulanmak boýunça ýörite görkezmeler girizildi. Şňa laýyklykda, ýaşaýjylardan hojalyk zerurlyklary üçin sarp edilýän suwuň möçberini wagtlaýynça çäklendirmek talap edilýär. Bu çärelere jemgyýetçilik derejesinde uly üns berilýär.

Girizilen wagtlaýyn çäklendirmeleriň çäginde raýatlara şahsy awtoulaglaryny ýuwmakdan, jaýlaryň daşyndaky bag-bostanlary hem-de otluk meýdançalary emeli usulda suwarmakdan, şeýle-de hususy howuzlary doldurmakdan saklanmak maslahat berilýär. Tebigy resurslary tygşytlamaga gönükdirilen bu çäreler sebitde emele gelen suw gytçylygynyň täsirini azaltmaga ýardam etmelidir.