Russiýa Federasiýasynyň daşary işler ministriniň orunbasary Mihail Galuzin Moskwada diplomatik wezipesini tamamlaýan Türkmenistanyň Russiýadaky Adatdan daşary we Doly ygtyýarly ilçisi Esen Aýdogdyýewe türkmen-rus gatnaşyklaryny ösdürmäge goşan goşandy üçin minnetdarlyk bildirdi.

13-nji martda geçirilen duşuşygyň dowamynda taraplar Türkmenistan bilen Russiýa Federasiýasynyň arasyndaky strategik hyzmatdaşlygyň esasy ugurlaryny ara alyp maslahatlaşdylar. Şeýle hem iki ýurduň arasynda dürli pudaklarda hyzmatdaşlygy mundan beýläk-de ösdürmegiň mümkinçilikleri boýunça pikir alyşmalar geçirildi.

Esen Aýdogdyýew hem öz gezeginde Russiýanyň Daşary işler ministrliginiň ýolbaşçylaryna diplomatik wezipesini ýerine ýetirýän döwründe beren goldawlary we hyzmatdaşlyklary üçin minnetdarlyk bildirdi. Ol bu hyzmatdaşlygyň Türkmenistan bilen Russiýanyň arasyndaky dostlukly gatnaşyklary has-da berkitmäge ýardam edendigini belledi.

Ýatladyp geçsek, mundan ozal Türkmenistanyň Prezidenti Serdar Berdimuhamedow tarapyndan Esen Aýdogdyýew Türkmenistanyň Russiýadaky ilçisi wezipesinden, şeýle hem Serbiýadaky, Sloweniýadaky we Bolgariýadaky ilçilik wezipelerinden boşadyldy. Şeýle-de ol Türkmenistanyň Amerikanyň Birleşen Ştatlaryndaky ilçisi wezipesine bellenildi.