Ýagşygeldi Kakaýew adyndaky Halkara nebit we gaz uniwersitetinde ýurdumyzyň orta mekdepleriniň 11–12-nji synp okuwçylarynyň arasynda geçirilen matematika, himiýa we informatika dersleri boýunça olimpiadalaryň jemleýji tapgyry dabaraly ýagdaýda tamamlandy. Bu bäsleşik zehinli ýaşlary ýüze çykarmaga we olary geljekde nebitgaz pudagy üçin zerur bolan takyk ylymlara ugrukdyrmaga gönükdirildi.

Olimpiadanyň saýlama tapgyryna ýurdumyzyň ähli welaýatlaryndan we Aşgabat şäherinden jemi 695 sany okuwçy gatnaşyp, öz bilimlerini senediler. Olaryň arasyndan iň ýokary netije görkezen 189 okuwçy final tapgyryna gatnaşmaga hukuk gazandy. Şahsy bäsleşik görnüşinde geçen jemleýji tapgyrda okuwçylar çylşyrymly meseleleri çözmek we nazary bilimlerini iş ýüzünde ulanmak boýunça bäsleşdiler.

Eminler toparynyň gelen netijelerine görä, dersler boýunça iň ýokary ballary toplan okuwçylar ýeňiji diýlip yglan edildi. Olara uniwersitetiň rektorynyň adyndan degişli derejeli diplomlar we ýörite sowgatlar gowşuryldy. Aýratyn bellenilmeli zat, bäsleşikde tapawutlanan ýaşlara okuwy tamamlanlaryndan soňra, şu abraýly ýokary okuw mekdebinde bilimlerini dowam etdirmek barada geljegi uly bolan teklip girizildi.

Olimpiadanyň çäklerinde okuwçylar üçin uniwersitetiň durmuşy bilen tanyşdyryş gezelençleri hem guraldy. Myhmanlar uniwersitetiň häzirki zaman ylmy barlaghanalaryny, baý muzeý gymmatlyklaryny, sport desgalaryny we okuw binalaryny synladylar. Bu çäre ýaşlaryň geljekki hünär saýlawyna we ylma bolan höwesiniň artmagyna uly goşant goşdy.