Kanadanyň Wankuwer şäherinde ýaşaýan Lia Uilson atly zenan ýerli ýaşaýjylaryň ünsüni çeken täsin tebigy waka bilen ýüzbe-yüz boldy. Ol heläkçilige uçran ýaraly guşa öz wagtynda kömek berip, ony ölümden halas etmegi başardy. Bu asylly hereketden soňra, ýabany guşlar tarapyndan zenana garaşylmadyk we özboluşly minnetdarlyk nyşanlary görkezilip başlandy. Halkara habar beriş serişdeleriniň maglumatyna görä, bu waka janly tebigat bilen ynsanyň arasyndaky täsin baglanyşygy aýdyň görkezýär.

Waka Lia Uilsonyň jaýlaryň golaýynda guşlaryň adaty bolmadyk tolgunyşygyny we aýlanyşyp ýörşüni görmegi bilen başlandy. Ýagdaýy barlap gören zenan ýangyn söndüriş gullugynyň işgärlerini kömege çagyrdy we olaryň kömegi bilen binanyň ýokary böleginde kyn ýagdaýa düşen gargany asynlylyk bilen aşak düşürdi. Halas edilen guş derrew ýabany haýwanlary goramak we dikeltmek boýunça ýöriteleşdirilen merkeze ýetirildi we ol ýerde zerur bolan kömekler berildi.

Guş sagalyp, tebigata goýberileninden soňra, garaşylmadyk täsinlikler ýüze çykyp başlady. Zenan daşaryk gezelenje çykan wagty, asmandan onuň öňüne ilki bilen çugdamlanan guş ýelekleri, soňra bolsa dürli çöpjagazlar, ýüň bölejikleri, hatda kiçijik guş höwürtgesi ýaly «sowgatlar» taşlanyp başlandy. Bu ýagdaý yzygiderli gaýtalanyp, guşlaryň amala aşyran ýagşylyga özboluşly jogaby hökmünde taryha girdi.

Häzirki wagtda zenan her gezek köçä çykanda, asmandan uçup gelýän guşlar ony hemme ýerde diýen ýaly yzygiderli ugradýarlar. Lia özüniň halas eden dostuny aýagyndaky ýörite bellik halkasyndan dessine tanaýar. Bu täsin waka tebigatyň we haýwanat dünýäsiniň hem özüne edilýän ýagşylyga örän duýgurdygynyň taryhy subutnamalarynyň birine öwrüldi.