Gazagystan Respublikasyna döwlet sapary bilen gelen Mongoliýanyň Prezidenti Uhnaagiýn Hurelsuh Astana şäherinde uly hormat bilen garşylanyldy. Saparyň çäklerinde iki ýurduň döwlet Baştutanlarynyň arasynda dar düzümde duşuşyk geçirilip, onda ikitaraplaýyn gatnaşyklaryň häzirki ýagdaýy we geljekki ugurlary ara alnyp maslahatlaşyldy. Kasym-Žomart Tokaýew öz çykyşynda gazak we mongol halklaryny asyrlar boýy dowam edip gelýän umumy taryhyň hem-de medeni kökleriň birleşdirýändigini aýratyn nygtady.

Gazagystanyň lideri iki goňşy halkyň däp-dessurlarynyň we durmuş ýörelgeleriniň meňzeşdigini bellemek bilen, bu gymmatlyklaryň häzirki wagtda döwletara gatnaşyklaryň binýadyny düzýändigini aýtdy. Häzirki döwürde Gazagystan we Mongoliýa strategik hyzmatdaşlyk ruhunda özara gatnaşyklary ösdürýärler. Şunuň bilen birlikde, parlamentara we hökümetara derejelerindäki hyzmatdaşlygyň barha berkeýändigi, muňa bolsa ýokary derejedäki yzygiderli duşuşyklaryň itergi berýändigi bellenildi.

Mongoliýanyň Prezidenti Uhnaagiýn Hurelsuh hem öz gezeginde Gazagystanyň gazanan uly ösüşlerine ýokary baha berdi. Ol Gazagystanyň Prezidentiniň parasatly ýolbaşçylygynda ýurtda amala aşyrylýan ykdysady we durmuş-syýasy özgertmeleriň mongol halkynda uly gyzyklanma döredýändigini mälim etdi. Hurelsuh 2024-nji ýyldaky özara saparlaryň iki ýurduň taryhynda "altyn harplar" bilen ýazyljakdygyny we hyzmatdaşlygyň täze tapgyryna ýol açandygyny belledi.

Prezidentleriň duşuşygynyň netijesi boýunça birnäçe möhüm resminamalara gol çekilmegine garaşylýar. Mundan iki ýyl ozal Gazagystanyň Prezidentiniň Ulan-Batora sapary mahalynda onlarça ylalaşyklara gol çekilipdi, häzirki sapar bolsa şol ylalaşyklaryň dowamy hökmünde täze anyk taslamalary durmuşa geçirmäge gönükdirilendir. Bu döwlet sapary Merkezi Aziýa we Gündogar Aziýa sebitleriniň arasyndaky dostlukly gatnaşyklary has-da berkitmekde taryhy ädim bolar.