Şu gün bütindünýä ylym we arheologiýa jemgyýetçiliginiň üns merkezinde duran esasy täzelikleriň biri hem Müsüriň meşhur Luksor şäheriniň golaýynda ýaşy 3000 ýyla barabar bolan täsin aramgäh toplumynyň ýüze çykarylmagydyr. Leýden uniwersitetiniň niderland arheologik ekspedisiýasy tarapyndan tapylan bu gadymy gurluşyk barada «CBS» telekanaly Müsüriň Syýahatçylyk we gadymy ýadygärlikler ministrligine salgylanyp habar berýär. Bu tapyndy 2018-nji ýylda başlanan giň göwrümli ylmy-gözleg taslamasynyň çäklerinde amala aşyryldy.

Tapylan toplum gaýada oýulyp ýasalan we tersine öwrülen «T» harpynyň şekilindäki ybadathana eltýän açyk howlyny öz içine alýar. Arheologlar howluda gowy saklanyp galan birnäçe binagärlik elementlerini, şol sanda girelgä eltýän ýapgyt pandusly basgançaklary we jaýlama sütünini goýmak üçin niýetlenen kerpiçden ýasalan oturgyçlary tapdylar. Aramgähiň içindäki ýazgylaryň kömegi bilen bu ýeriň Paser atly adama degişli bolandygy anyklanyldy. Tapylan suratlarda Paseriň hudaýlara sežde edip duran pursatlary hem-de aýaly bilen sowgatly stoluň başynda oturan şekilleri çekilipdir.

Alymlaryň çaklamalaryna görä, bu tapyndy Gadymy Müsüriň XIX we XX nesilşalyklarynyň döwrüne — Ramessidler eýýamyna degişlidir. Häzirki wagtda arheologlar bu ýerde jaýlanan adamlaryň ählisiniň şahsyýetlerini we olaryň durmuşyny has çuňňur öwrenmegi meýilleşdirýärler. Bellemeli zat, 2025-nji ýylda hut şu sebitde 20 ýyldan gowrak dowam eden abatlaýyş işlerinden soň, Amenhotep III-niň döwrüne degişli başga bir uly aramgäh hem syýahatçylar üçin açylypdy. Bu bolsa Luksoryň dünýäniň iň möhüm arheologik merkezi hökmündäki statusyny has-da berkidýär.