2025-nji ýylyň netijelerine görä, Russiýada döwlet maliýeleşdirmesi esasynda surata düşürilen çeper filmleriň agramly bölegi prokatda garaşylýan girdejini getirmedi. «КГ PROGRESS» seljeriş merkeziniň berýän maglumatlaryna görä, jemi 41 sany döwlet goldawyndaky taslamanyň diňe 5-si özüne sarp edilen çykdajylary ödemegi başardy. Bu bolsa resmi taýdan goldanylan filmleriň diňe 12 göteriminiň işewürlik nukdaýnazaryndan şowly bolandygyny görkezýär.

Maliýe taýdan ýylyň iň girdejili taslamasy «Zümerret şäheriniň jadygöýi. Sary kerpiç ýol» atly film boldy. Bu ekran eseri ähli önümçilik we mahabat çykdajylaryndan daşgary 1,39 mlrd rubl sap girdeji gazanyp, sanawyň başyny çekdi. Onuň yzyndan gelýän «Kakasynyň gyzlary. Ejem gaýdyp geldi» we «Bürgüt. Ilkinji batyr» ýaly filmler hem degişlilikde 515 mln we 341 mln rubl girdeji getirip, sanlyja şowly taslamalaryň hataryna goşuldy.

Emma käbir iri göwrümli taslamalar garaşylmadyk maliýe şowsuzlyklaryna duçar boldy. Hususan-da, «Gaharjaň şäher» filmi 2025-nji ýylyň iň uly ýitgili taslamasy hasaplanyp, oňa özüni ödemek üçin 1,86 mlrd rubl ýetmedi. Bu görkeziji kino pudagynda döwlet serişdeleriniň peýdalanylyşy we tomaşaçylaryň islegleriniň dogry çaklanmagy baradaky meseleleri ýene-de bir gezek gün tertibine getirdi.

Aýratyn bellemeli zat, «Kraken» filmi döwletden 760 million rubl möçberinde iň uly maliýe kömegini alandygyna garamazdan, prokatda şowsuzlyga uçrady. Ol hatda özüne sarp edilen serişdeleri hem ödemegi başarmady we ýylyň iň uly telekeçilik şowsuzlyklarynyň biri hökmünde hasaba alyndy. Kino gaznasynyň we Medeniýet ministrliginiň maglumatlary esasynda taýýarlanan bu hasabat, geljekde filmleriň maliýeleşdiriş ulgamynyň täzeden gözden geçirilmegine sebäp bolup biler.