Türkmenistanda ekologiýa başlangyçlaryny ösdürmekde we sanly ulgamlary giňeltmekde nobatdaky möhüm ädim ädildi — «Ýaş tebigatçy» jemgyýetçilik guramasynyň resmi web-saýty, tebigatchy.co.tm işe girizildi. Tebigatyň täzelenýän bahar günlerinde işe başlan bu platforma guramanyň işinde täze ösüş tapgyrynyň başlandygyny alamatlandyrýar.

 

Täze sanly platformanyň döredilmegi amala aşyrylýan ekologiýa taslamalary baradaky maglumatlaryň elýeterliligini ýokarlandyrmaga hem-de jemgyýet bilen aragatnaşygy has-da işjeňleşdirmäge gönükdirilendir. Web-saýt guramanyň işini döwrebaplaşdyrýan möhüm gural hökmünde çykyş edýär.

 

«Ýaş tebigatçy» jemgyýetçilik guramasynyň esasy iş ugurlary ýurdumyzyň ekologiýa abadançylygyny üpjün etmek, ýaşlaryň arasynda ekologiýa medeniýetini kemala getirmek hem-de «ýaşyl» endikleri wagyz etmekden ybaratdyr. Gurama milli ekologiýa maksatnamalaryna işjeň gatnaşmak bilen birlikde, meýletinçilik hereketleriniň ösdürilmegine hem uly üns berýär.

 

Guramanyň ýolbaşçysy Leýli Şyhmädowanyň belleýşi ýaly, täze web-saýtyň işe girizilmegi möhüm ähmiýete eýedir:

«Bu platforma diňe bir maglumat çeşmesi bolman, eýsem, tebigaty goramak boýunça alnyp barylýan işleriň açyklygyny üpjün edýän we ähli gyzyklanýan taraplary birleşdirýän netijeli guraldyr. Şeýle hem ol halkara hyzmatdaşlygy pugtalandyrmakda möhüm köpri bolar».

 

Web-saýtda ulanyjylar türkmen, rus we iňlis dillerinde taýýarlanan habarlar, makalalar hem-de hasabatlar bilen tanşyp bilerler. Mundan başga-da, her bir raýat gurama agza bolup ýa-da meýletinçilik hereketine goşulyp, tebigaty goramak işine öz goşandyny goşup biler.

 

Täze web-saýtyň işe girizilmegi jemgyýetçilik we halkara guramalar bilen hyzmatdaşlygy has-da ösdürmäge, şeýle hem ýurdumyzyň ekologiýa syýasatynyň üstünlikli durmuşa geçirilmegine ýardam berer.