Şu günler Gruziýanyň paýtagty Tbilisi şäherinde Türkmenistanyň Medeniýet günleri uly dabaralara beslenip geçirilýär. Bu halkara çäre iki ýurduň arasyndaky medeni-ynsanperwer gatnaşyklaryň ösüşiň täze derejesine çykýandygynyň aýdyň subutnamasyna öwrüldi. Medeni çäräniň açylyş dabarasy türkmenistanly medeniýet we sungat işgärleriniň taýýarlan amaly-haşam sungatynyň eserlerinden, suratkeşleriň hem-de heýkeltaraşlaryň täsin işlerinden ybarat bolan giň möçberli sergi bilen utgaşdy. Sergide türkmen halkynyň taryhyň dowamynda döreden dünýä nusgalyk milli däp-dessurlary we gymmatlyklary dabaraly görkezildi. Açylyş dabarasy mynasybetli guralan aýdym-sazly çykyşlar bolsa bu ýere ýygnanan myhmanlarda ýakymly täsirler galdyrdy.

Medeniýet günleriniň çäklerinde iki ýurduň döredijilik, kitaphana we teatr işgärleriniň gatnaşmagynda birnäçe möhüm duşuşyklar geçirildi. Kitaphana wekilleriniň duşuşygynda häzirki döwürde özara tejribe alyşmak we degişli ugurlar boýunça gatnaşyklary işjeňleşdirmek meseleleri ara alanyp maslahatlaşyldy. Şeýle hem Türkmenistanyň we Gruziýanyň teatr ýolbaşçylarynyň özara duşuşyklary guralyp, onda sahna ussatlary teatr sungatynyň häzirki ýeten derejesi hem-de ony mundan beýläk-de ösdürmegiň geljegi barada gyzyklanma bildirilýän pikir alyşmalary guraldy.

«Watan» habarlar gepleşiginiň habar bermegine görä, Türkmenistanyň döredijilik wekiliýetiniň agzalary Tbilisi şäheriniň gözel we taryhy ýerlerinde ýörite gezelençde boldular. Medeniýet günleriniň maksatnamasynyň köpugurly häsiýete eýe bolmagy gatnaşyjylara we Gruziýanyň ýaşaýjylaryna türkmen halkynyň baý medeni mirasy bilen has ýakyndan tanyşmaga giň mümkinçilik döretdi.