Türkmen halkynyň Milli Lideri Gurbanguly Berdimuhamedow şu gün Balkan welaýatyna iş saparyny amala aşyrdy. Türkmenistanyň Halk Maslahatynyň Başlygy saparyň dowamynda döwletimiziň daşary syýasat ugruna laýyklykda 2026-njy ýylda Türkmenistanda geçirilmegi meýilleşdirilýän halkara çäreleriň ýokary derejede guralmagyna degişli meseleler bilen tanyşdy.

Saparyň çäklerinde Gahryman Arkadag Hazaryň kenarynda ýerleşýän halkara çäreleriň geçiriljek toplumyna degişli taslamalary synlady. Bu ýerde ýanaşyk ýerleriň abadanlaşdyrylyşy, girelgeleriň döwrebap bezelişi, binalaryň içki tehniki üpjünçiligi, halkara forumlaryň tapgyrlaýyn geçiriljek meýdançalarynyň ýerleşişi hem-de iri maslahatlar üçin niýetlenen binalarda alnyp barylýan bezeg işleri aýratyn üns merkezinde boldy.

Türkmen halkynyň Milli Lideri bu ýerde geçiriljek halkara çärelerine gatnaşjak myhmanlar üçin ähli amatly şertleriň döredilmelidigini belledi. Şeýle hem sanly ulgamyň mümkinçilikleriniň doly ornaşdyrylmagynyň möhümdigine ünsi çekip, jogapkär ýolbaşçylara degişli maslahatlaryny berdi.

Iş saparynyň dowamynda Gahryman Arkadag dikuçarda «Awaza» milli syýahatçylyk zolagynyň üstünden uçuş amala aşyryp, dowam edýän gurluşyk işleriniň ýagdaýy bilen hem tanyşdy. Balkan welaýatyna bolan iş saparyny tamamlan Milli Lider bu ýerden Aşgabada ugrady.