Oýun sanawy
Futbol boýunça dünýäniň häzirki çempiony Argentinanyň milli ýygyndysy 2026-njy ýylyň dünýä birinjiliginiň toparçalaýyn tapgyryndaky ilkinji duşuşygynda Alžiriň toparyny 3:0 hasabynda gurak çykdy. ABŞ-nyň Kanzas-Siti şäherinde guralan bäsleşikde günorta amerikalylar bäsdeşlerinden her taraplaýyn üstün çykdylar.
J toparçanyň bu oýnunda Argentinanyň kapitany Lionel Messi tapawutlandy. Tejribeli hüjümçi 17-nji, 60-njy we 76-njy minutlarda geçiren gollary bilen het-trik etmegi başardy. Bu görkeziji Messiniň dünýä çempionatlaryndaky jemi gollarynyň sanyny 16-a ýetirip, onuň taryhda iň netijeli bombardir bolan germaniýaly Miroslaw Kloze bilen birinji orny paýlaşmagyna şert döretdi. Şeýle-de, 38 ýaşly ýyldyz taryhda alty sany dünýä çempionatyna gatnaşan ilkinji futbolçy boldy.
Karýerasynda 8 gezek «Altyn top» baýragyny alan we häzirki wagtda MLS-iň «Inter Maýami» klubunda oýnaýan Messi, ozal «Barselona» bilen 4 gezek Çempionlar ligasynyň ýeňijisi bolupdy. Awstriýa we Iordaniýa bilen bilelikde J toparçada ýerleşýän Argentina indiki tapgyrda, ýagny 22-nji iýunda Awstriýanyň ýygyndysy bilen güýç synanyşar. Alžir bolsa 23-nji iýunda Iordaniýa garşy meýdança çykar.
Şeýle hem okanyň
UFC 336 ýaryşynda Karlos Prates bilen Maýkl Moralesiň arasyndaky söweş Islam Mahaçewiň indiki garşydaşyny kesgitlär
26 Okt. 11:00UFC guramasynyň ýarym orta agram derejesindäki çempiony Islam Mahaçewiň indiki garşydaşy 2027-nji ýylyň 30-njy ýanwarynda Torontoda geçiriljek «UFC 336» turnirinde belli bolar. Reýtingde ikinji we üçünji orunlary eýeleýän braziliýaly Karlos Prates bilen ekwadorly Maýkl Moralesiň arasyndaky duşuşykda diňe bir çempionlyk söweşine çykmak hukugy däl, eýsem ýarym orta agram derejesindäki wagtlaýyn çempionlyk guşagy hem orta goýlar. Mahaçewiň ozaokky söweşi awgust aýynda bolup geçipdi we ol irlandiýaly Ian Gerri ýeňip, ozal ýeňil agramda eýelän üstünliklerinden soň täze agramda hem öz titulyny goramagy başarypdy.
UFC-niň ýolbaşçysy Dana Waýtyň bellemegine görä, gurama Mahaçewiň söweşini 2027-nji ýylyň ýanwarynda geçirmegi meýilleşdiripdi, emma russiýaly çempion 8-nji fewraldan 8-nji marta çenli dowam etjek Remezan aýy tamamlanýança oktagona çykmakdan ýüz öwrdi. Çempionyň çykyşlarynda arakesme boljakdygy sebäpli, gurama Prates bilen Moralesiň duşuşygyny wagtlaýyn çempionlyk söweşi derejesine göterdi. Söweşijileriň ikisi hem ýokary netijeleri görkezýärler: Prates yzly-yzyna üç gezek Jeff Nil, Leon Eduards we Jek Della Maddalena ýaly garşydaşlaryny nokauta giden bolsa, Maýkl Morales UFC-de 7 duşuşykda ýeňilmän кеlýär.
Şeýle hem Torontoda geçiriljek «UFC 336» turniriniň çäklerinde guramanyň iň ýeňil agram derejesindäki häzirki çempiony Joşua Wan öz çempionlyk guşagyny goramak üçin oktagona dolanar. Mýanmaly söweşiji çempionlyk ugrundaky duşuşykda Angolada doglan we Portugaliýa wekilçilik edýän Manel Kape bilen güýç synanyşar. Bu giň göwrümli söweş agşamy halkara sport janköyerleriniň uly sabyrsyzlygy bilen garaşýan bäsleşikleriniň birine öwrer.
Blitz