Oýun sanawy
Bolgariýada geçirilen IMC — 2025-de türkmenistanly talyplar dürli derejeli medallara eýe boldular
27-nji iýuldan 3-nji awgust aralygynda Bolgariýanyň Blagoewgrad şäherinde geçirilen 32-nji halkara matematika bäsleşiginde (IMC — 2025) türkmen talyplary üstünlikli çykyş etdiler.
Abraýly bäsleşigiň netijelerine görä, türkmenistanly talyplar 2 altyn, 2 kümüş we 3 bürünç medal gazandylar. Bu barada «Türkmenistan: Altyn asyr» saýtynda habar berildi.
Altyn medallara Halkara ynsanperwer ylymlary we ösüş uniwersitetiniň talyplary Medina Ödäýewa we Nurmyrat Ataýew mynasyp boldy. Şol uniwersitetiň talyby Kerim Toýlyýew kümüş medal aldy. Magtymguly adyndaky Türkmen döwlet uniwersitetiniň talyby Şabibi Nurjanowa hem kümüş medal gazandy.
Bürünç medallara Batyr Öwezmyradow (Türkmen döwlet binagärlik-gurluşyk instituty), Gurtgeldi Hanow (Seýitnazar Seýdi adyndaky Türkmen döwlet mugallymçylyk instituty) we Nurmuhammet Goçiýew (Türkmenistan Döwlet energetika instituty) eýe boldy.
Bäsleşigiň ýeňijiler medallar we degişli diplomlar bilen sylaglandy.
Çeşmäniň habaryna görä, şu ýyl bu bäsleşige 52 ýurduň ýokary okuw mekdeplerinden 434 talyp gatnaşdy.
Şeýle hem okanyň
Iň köp görülen
Türkmenistanyň «Ahal» futbol kluby Eýranyň Ysfahan şäherine AFC Çempionlar ligasy-2-niň toparlaýyn tapgyrynyň dördünji oýnunda ýerli «Sepahan» toparyna garşy çykyş etmek üçin geldi diýip, klubyň metbugat gullugy habar berýär.
«Bu gün „Ahal“ toparynyň wekiliýeti Eýran Yslam Respublikasynyň Ysfahan şäherinde „Sepahan“ toparynyň wekilleri tarapyndan mähirli garşylanyldy. Biz garşy alyjy topara hoşniýetli garşylawlary üçin minnetdarlyk bildirýäris» diýlip, beýanatda aýdylýar.
Oýun noýabr aýynyň 4-ne geçiriler, başlanjak wagty — Aşgabat wagty bilen sagat 19:30. Bu toparlar öňem duşuşypdylar — üçünji tapgyrda «Sepahan» 1:0 hasabynda ýeňiş gazanypdy. Şol duşuşyk hem Aziýa futbol konfederasiýasynyň (AFC) karary boýunça Ysfahanda geçirilipdi. Ilkibaşda oýun Arkadag şäherinde geçirilmelidi, emma AFC oýny Eýrana geçirmek baradaky karara geldi.
Iki tapgyrdan soň Iordaniýanyň «Al-Hussein» topary 6 utuk bilen «C» toparçasynda öňdeligi eýeleýär. Olar «Sepahan» (1:0 öýde) we «Ahal» (4:1 myhmanlykda) toparlaryny ýeňdiler. «Sepahan» 3 utuk bilen ikinji ýerde, «Ahal» bolsa entek utuk gazanyp bilmedi.
«Ahalyň» ýagdaýy Hindistanyň «Mohun Bagan» klubunyň bäsleşikden çykarylmagy sebäpli has-da kynlaşdy. Şonuň netijesinde AFC «Ahalyň» Kalkuttada gazanan 1:0 hasabyndaky ýeňşini ýatyrdy. Hindistanly topar «Sepahan» bilen geçiriljek oýna gelmedigi üçin dissiplinar çäre hökmünde ýaryşdan çykaryldy.
Blitz