Oktýabr aýynyň 3-ne, Türkmenistanyň Ylymlar akademiýasynyň Taryh we arheologiýa institutynda Arheologiýa ugrunda bilim alýan Türkmenistanyň Döwlet medeniýet institutynyň 2-nji ýyl talyplary üçin tejribe we öwrediji duşuşyk geçirildi. Bu çäre mugallym Maýa Emirowanyň ýolbaşçylygynda guraldy.

Duşuşykda institutyň ylmy işgäri Kakadurdy Durdýew arheologik tapyndylaryň çyzgylarynyň taýýarlanylyşy barada giňişleýin maglumat berdi. Ol okuwçylara keramiki küýzäniň çyzgylary esasynda şekillendiriş işleriniň nädip ýerine ýetirilýändigini görkezdi. Paryzdepede tapylan bu küýzäniň ýüzünde dag çeşmeleri şekillendirilen bolup, ol gadymy türkmen topragyndaky sungat ösüşiniň beýik derejesini görkezýär.

Taryh ylymlarynyň kandidaty Allaguly Berdiýew çykyşynda Beýik Ýüpek ýolunyň türkmen topragyndan geçen ugrundaky şäherleriň we kerwen saraýlarynyň taryhy ähmiýetini belläp geçdi. Ol bu ýerleriň ykdysady we medeni ösüşe oňyn täsir edendigini nygtady.

Ylmy işgäri Şohrat Annataganyň çykyşynda bolsa ýurduň çägindäki Paryzdepe ýadygärligi öwrenildi. Ol ýerde bronza döwrüne degişli tapyndylaryň eneolit gatlagynda, şeýle hem eneolit döwrüniň zatlarynyň bronza döwrüniň gatlagyndan tapylmagy, alymlaryň ýadygärligi takyk döwürlemegini kynlaşdyrýandygyny aýtdy.

Duşuşyk ahyrynda talyplar alymlara gyzyklandyrýan sowallaryny berip, giňişleýin maglumat aldylar.