Halkara dynç alyş we amaly-sagaldyş pudagynda täze taslamany amala aşyrmak maksady bilen, dünýä belli NBCUniversal korporasiýasy Ýewropa ykontinentinde özüniň ilkinji ägirt uly desgasyny gurnap başlaýar. Taslamanyň çäginde gurulmagy göz öňünde tutulýan döwrebap dynç alyş merkeziniň umumy bahasy 5 milliard funt sterlingden (6,8 milliard ýewrodan) gowrak bolup, ol syýahatçılık ulgamyny ösdürmäge gönükdiriler.

Innowasion medeni-dynç alyş toplumynyň gurluşygy London şäheriniň golaýynda, takmynan 45 minutlyk aralykda ýerleşýän Bedford şäherinde meýilleşdirilýär. Pudaklaýyn meýilnamalara we halkara kadalara laýyklykda, taslamanyň çäginde göz öňünde tutulan binalar toplumynyň doly rasmileşdirilip, 2033-nji ýylda ulanylmaga berilmegine garaşylýar.

Bu döwrebap merkeziň düzüminde birnäçe ugurlar boýunça ýöriteleşdirilen oýun meýdançalary, seýilgäh attraksionlary, 500 otagly kaşaň myhmanhana, söwda we köpçülikleýin merkezler hem-de dürli restoranlar ýerleşer. Kompaniýanyň ykdysady bilmenleriniň çaklamalaryna görä, taslama amala aşyrylandan soňra, açylan ilkinji ýylynda bu ýere geljek syýahatçylaryň sany 8,5 million adamdan geçer.

Beýik Britaniýanyň hökümet düzümleri hem sebitiň ulag we beýleki durmuş düzümlerini döwrebaplaşdyrmak üçin 1,3 milliard funt sterling möçberinde döwlet serişdelerini gönükdirmegi meýilleşdirýär. Ýaşaýyş we gurluşyk tapgyrynda 20 müňe golaý täze iş ornunyň ýüze çykmagyna, taslama doly güýjünde işläp başlanyndan soňra bolsa ýene-de 8 müň adamyň durnukly iş üpjünçiligine eýe bolmagyna garaşylýar. Çaklamalara görä, 2055-nji ýyla çenli bu taslamanyň ýurduň ykdysadyýetine gurluşyk üsti bilen getirjek umumy peýdasy 50 milliard funt sterlinge barabar bolar.