Ýaponiýanyň Ýokkaiti şäheriniň häkimligi seýilgähleri we açyk meýdançalary haşal otlardan arassalamak üçin adaty ot orujy işgärleriň deregine dokuz sany geçini işe wezipelendirip, takmynan 2 müň dollar tygşytlamagy başardy. «Mainichi Japan» neşiriniň maglumatlaryna salgylanýan «Gazeta.ru» saýtynyň habar bermegine görä, öň bu işler üçin sarp edilýän 800 müň ýen (5 müň dollar töweregi) çykdajy 500 müň ýene (3,1 müň dollar) çenli azaldy. Munuň esasy sebäbi bolsa orlan otlary daşamak we ýok etmek üçin goşmaça pulyň gerek bolman, otlaryň hemmesiniň geçiler tarapyndan iýilmegidir.

Tört aýakly «işgärler» 8-nji iýunda 4,7 inedördül kilometrlik meýdana otlamaga goýberildi. Geçiler diňe bir meýdançanyň daşky görnüşini gözelleşdirmek bilen çäklenmän, eýsem boý alan gür otlary iýip, şäher howdanlarynyň suwunyň haşal otlar tarapyndan hapalanmagynyň hem öňüni alýarlar. Bu mallaryň eýesi bolan «Meýmeý» fermasynyň wekili Sýudzi Uehiranyň aýtmagyna görä, ýekeje geçi bir günüň dowamynda 90 litrlik uly torbalaryň ikisine barabar bolan gür oty arkaýyn iýip bilýär. Ýokkaiti şäheriniň häkimligi bu synag taslamasy doly şowly geçse, geljekde şäheriň beýleki künjeklerinde hem möwsümleýin işgärleriň ornuna geçileri ulanmagy meýilleşdirýär.