Şu gün Türkmenistanyň Söwda-senagat edarasynyň binasynda saglygy goraýyş we lukmançylyk senagaty işgärleriniň güni mynasybetli geçirilýän sergide halkara Fly2Doctor platformasynyň diwarlygy aýratyn üns merkezinde boldy. Sergä Hindistandan gelen, GD Healthcare Private Limited kompaniýasynyň direktory Şiwam Sing Çauhan hem gatnaşdy. Biz onuň bilen söhbetdeş bolup, kompaniýanyň maksatlary we hyzmatdaşlygyň mümkinçilikleri barada gürrüň etdik.

 

— Jenap Çauhan, Fly2Doctor platformasy näme we onuň esasy maksady nämeden ybarat?

 

— Fly2Doctor — dünýäniň dürli künjeklerinden näsaglara iň gowy klinikalary we lukmanlary tapmaga kömek edýän halkara platformadyr. Biz lukmançylyk syýahatyny elýeterli, açyk we ygtybarly etmegi maksat edinýäris. Esasy wezipesi — näsag bilen lukmany gönüden-göni birleşdirmek we adamlara ýokary hilli lukmançylyk kömegini üpjün etmekdir.

 

— Kompaniýa dürli ýurtlardan, şol sanda Türkmenistandan gelen näsaglara daşary ýurtda bejergi almaga nähili kömek edýär?

 

— Kompaniýa näsaga ilkinji maslahatlaşmadan başlap, öýüne dolanýança çenli hemra bolýar. Lukman-koordinatory, klinikany saýlaýar, wiza, myhmanhana we ulag meselelerinde ýardam edýär. Türkmenistandan gelen näsaglar üçin biz aýratyn programmalar taýýarladyk, sebäbi olaryň rahatlygy we ynamy biziň üçin iň möhümdir.

 

— Siz GD Healthcare Private Limited kompaniýasynyň ýolbaşçylaryndan biri. Siziň halkara hyzmatdaşlyga bolan gyzyklamalaryňyz nämeden gelip çykýar?

 

— Men lukmançylykda adamlara hyzmat etmek üçin işleýärin. Hindistanda birnäçe ýyllap işländen soň, daşary ýurtly näsaglaryň Hindistandaky bejergi mümkinçilikleri barada maglumatynyň azdygyny gördüm. Şol sebäpli biz dünýäniň dürli ýurtlaryndaky lukmanlary we näsaglary birleşdirýän ulgamy döretmegi makul bildik.

 

— Hindistan bilen Türkmenistanyň saglygy goraýyş ulgamynda hyzmatdaşlygynyň mümkinçiliklerine nähili baha berýärsiňiz?

 

— Bu ugurda uly mümkinçilikler bar. Hindistan innowasion tehnologiýalara eýe, Türkmenistan bolsa öz saglygy goraýyş ulgamyny yzygiderli ösdürýär. Bilelikde biz tejribe alyşyp, täze taslamalary durmuşa geçirip bileris.

 

— Türkmenistanyň Saglygy goraýyş we derman senagaty işgärleriniň güni mynasybetli näme aýdarsyňyz?

 

— Men ähli türkmen lukmanlaryna çäksiz hormatymy bildirýärin. Siziň zähmetiňiz beýikdir. Size saglyk, ruhubelentlik we adamlaryň janyna şypa bermekde üstünlik arzuw edýärin.