26-njy ýanwarda Hindistan Respublikasy döwletçilik taryhynda möhüm orny eýeleýän — Respublika gününiň 76 ýyllygyny bellär. Hut şu gün, 1950-nji ýylda Hindistanyň Konstitusiýasy güýje girip, ýurt özüni garaşsyz, demokratik we respublikan döwlet hökmünde yglan etdi.

 

Soňky onýyllyklaryň dowamynda Hindistan uly ösüş ýolundan geçdi. Häzirki wagtda ýurt dünýäniň dördünji iň uly ykdysadyýetine öwrülip, iri ykdysadyýetleriň arasynda iň çalt ösýän döwletleriň biri hökmünde tanalýar. Bu ösüş durnukly ykdysady syýasat, tehnologik ösüş we institusional berklik bilen üpjün edilýär.

 

2024-nji ýylda geçirilen parlament saýlawlary Hindistanyň demokratik ýörelgelerine ygrarlylygynyň aýdyň subutnamasy boldy. Saýlawlara 640 milliondan gowrak raýat gatnaşyp, bu giň gerimli demokratik proses dünýäde demokratiýanyň berkligini görkezdi.

 

Hindistan häzirki wagtda innowasiýa we telekeçilik ulgamynda hem öňdebaryjy orun eýeleýär. Ýurtda dünýäde üçünji iň uly startap ekosistemasy emele geldi. Şeýle hem Hindistan maglumat tehnologiýalary, real wagtlaýyn sanly tölegler, derman senagaty, saglygy goraýyş we gaýtadan dikeldilýän energiýa ulgamlarynda dünýä liderleriniň hatarynda durýar.

 

Kosmos pudagynda gazanylan üstünlikler hem aýratyn bellärliklidir. Iki hindi hemrasynyň üstünlikli birleşdirilmegi, «Aditya L1» Gün obserwatoriýasynyň galo-orbitasyna çykarylmagy we «Çandraýan-3» missiýasynyň Aýyň Günorta poluna golaý ýerde üstünlikli gonmagy Hindistanyň kosmos döwletleri hataryndaky ornuny has-da berkitdi.

 

Premýer-ministri Hormatly Narendra Modiniň ýolbaşçylygynda Hindistan «Wikşit Bharat» («Ösen Hindistan») konsepsiýasyny üstünlikli durmuşa geçirýär. Bu strategiýa 2047-nji ýyla — Hindistanyň Garaşsyzlygynyň 100 ýyllygyna çenli ýurduň hemmetaraplaýyn ösüşini maksat edinýär.

 

«Giňeldilen goňşuçylyk» syýasatynyň çäginde we «Wasudhaýwa Kutumbakam» («Älem — bir maşgala») diýen gadymy hindi filosofiýasyna eýerip, Hindistan dostlukly döwletler bilen, şol sanda Türkmenistan bilen, ösüş boýunça tejribelerini paýlaşmagy dowam etdirýär.

 

Özara hormat goýmak we ynam esasynda ösdürilýän hindi-türkmen gatnaşyklary geljekde has-da giň mümkinçiliklere eýedir. Türkmenistanyň Prezidenti Hormatly Serdar Berdimuhamedow we Hindistanyň Premýer-ministri Narendra Modi tarapyndan alnyp barylýan paýhasly syýasatyň netijesinde ikitaraplaýyn hyzmatdaşlygyň täze derejelere çykmagyna garaşylýar.

 

Respublika güni — Hindistan üçin döwletçilik, demokratiýa we halkara hyzmatdaşlygyň nyşany bolup, halklaryň arasyndaky dostlugy berkitmegiň hem möhüm pursadydyr.