Dünýä ýurtlarynyň arasynda iň dowamly iş tertibi bolan döwletleriň täze sanawy yglan edildi. Bu reýtingde Butan Patyşalygy iň işeňňir ilatly ýurt hökmünde birinji ýeri eýeledi. Hasabatlara görä, bu ýurtda bir işçiniň hepdelik zähmet sarp edişi ortaça 54,7 sagada deňdir. Hünärmenler Butandaky bu ýokary görkezijini ykdysadyýetde awtomatlaşdyrylan ulgamlaryň ýetmezçiligi we el zähmetini talap edýän pudaklaryň agdyklyk etmegi bilen düşündirýärler.

Sanawyň öňdebaryjy üçlügine Afrikanyň wekili bolan Lesoto (hepdede 50 sagat) hem-de San-Tome we Prinsipi (49 sagat) ýaly döwletler girdi. Bu ýurtlarda hem zähmet agramynyň ýokarylygy ykdysadyýetiň gurluşy we tehnologik ösüşiň derejesi bilen gönüden-göni baglydyr. Şeýle hem dünýäniň iň dowamly iş hepdesi bolan bäşligine Kongo Respublikasy we Iordaniýa ýerleşdi.

Geografiki taýdan seredilende, iň agyr iş tertibi bolan ýurtlaryň aglabasy Aziýa we Afrika yklymlaryna degişlidir. Bu sebitlerde ykdysadyýetiň esasy sütünlerini oba hojalygy, tokaýçylyk we beýleki tebigy serişdeleri gaýtadan işlemek pudaklary düzýär. Bu ulgamlarda önümçiligiň esasy bölegi entek tehnologiýalar bilen däl-de, adamyň fiziki güýji arkaly amala aşyrylýar.

Ykdysady ekspertler iş sagatlarynyň azlygynyň hemme wagt ýurtda bolçulygyň bardygyny aňlatmaýandygyny belleýärler. Iş wagty iň gysga bolan ýurtlaryň sanawynda durnukly ykdysadyýetli Norwegiýa bilen bir hatarda, durmuş-ykdysady kynçylyklary başdan geçirýän Ýemeniň hem ýer almagy, bu görkezijiniň diňe bir bähbit däl, eýsem käwagt işsizlik ýa-da ykdysady bökdençlikler bilen hem bagly bolup biljekdigini görkezýär.