Altyn boýunça dünýä geňeşiniň (WGC) täze hasabatyna görä, häzirki wagtda dünýäde gazylyp alnan ähli altynyň umumy bazar bahasy takmynan 31 trillion dollar möçberinde kesgitlenýär. 2025-nji ýylyň ahyryna çenli adamzadyň taryhy boýunça gazylyp alnan bu gymmatbaha metalyň umumy mukdary 220 müň tonna ýetdi. Bu maglumatlar altynyň halkara maliýe ulgamynda iň ygtybarly we strategik ähmiýetli serişde bolup galýandygyny görkezýär.

Maýa goýum maksatlary üçin peýdalanylýan elýeterli altynyň gymmaty 15 trillion dollar töweregi bahalanýar. Onuň esasy bölegini, ýagny 9 trillion dollaryny hususy maýa goýum gaznalarynda saklanýan guýmalar we şaýylyklar emele getirýär. Şeýle hem dünýäniň merkezi banklarynyň ätiýaçlyk gorlarynda 5 trillion dollarlyk altyn saklanýar, galan 1,5 trillion dollar bolsa dürli maliýe gurallaryna degişlidir.

Hasabatda altynyň dünýä boýunça paýlanyşy barada hem takyk görkezijiler getirilýär. Altynyň iň uly bölegi, ýagny 44 göterimi zergärçilik önümleriniň paýyna düşýär. Ondan soňra 21 göterim bilen guýmalar we şaýylyk pullar, 18 göterim bilen bolsa döwletleriň merkezi banklarynyň ätiýaçlyk gorlary gelýär. Bu paýlanyş altynyň diňe bir baýlyk nyşany däl, eýsem döwletleriň ykdysady howpsuzlygynyň hem kepili wezipesini ýerine ýetirýändigini tassyklaýar.

Altynyň ägirt uly möçberlerine we ýokary bahasyna garamazdan, hünärmenler onuň global maýa goýum sanawlarynda heniz hem az orun tutýandygyny belleýärler. Bu bolsa geljekde durnuksyz maliýe ýagdaýlarynda altyna bolan islegiň has-da artmagyna garaşylýandygyny aňladýar. Gymmatbaha metal özüniň üýtgewsiz gymmatyny saklamak bilen, dünýä ykdysadyýetinde iň esasy "howpsuz duralga" bolmagy dowam edýär.