Fransiýanyň Muşe obasynda ýerli mekdebi we başlangyç synpy ýapylmakdan halas etmek üçin täsin usul oýlanyp tapyldy. Okuwçylaryň sanynyň kadadan azdygy sebäpli, mekdep ýolbaşçylary bäş sany ýaş sygyry resmi taýdan okuwçy hökmünde hasaba aldylar. Bu çäre bilim edarasynyň işini dowam etdirmegi üçin zerur bolan statistik görkezijileri üpjün etmek maksady bilen amala aşyryldy.

Elzas sebitinde ýerleşýän bu obada çagalaryň sanynyň azalmagy bilim ulgamy üçin uly kynçylyk döredýär. Häzirki wagtda mekdepde bäş sany synp bar, ýöne geljekki okuw ýylynda täze okuwçylaryň sanynyň örän az bolmagyna garaşylýar. Eger mekdepde talap edilýän mukdarda okuwçy bolmasa, döwlet tarapyndan synplaryň biriniň maliýeleşdirilmegi bes edilip, ol ýapylmaly bolýar.

Bu başlangyjy ýerli fermerleriň biri goldady we öz mallarynyň bäşisini wagtlaýynça "okuwçy" hökmünde bermäge razy boldy. Fermer özüniň okan mekdebiniň ýapylmagyna ýol bermezlik üçin şeýle ädimiň zerurdygyny belleýär. Häzirki wagtda bu "täze okuwçylar" mekdebiň howlusynda saklanyp, olar resminamalarda doly hukukly bilim alýanlar hökmünde görkezilýär.

Muşeniň häkimi Hose Şruoffeneger bu ýagdaýyň tragikomediki häsiýete eýedigini aýdýar. Onuň sözlerine görä, sygyrlaryň sanawa goşulmagy gülkili görünse-de, hakykatda bu oba mekdepleriniň ýüzbe-ýüz bolýan agyr ýagdaýyny görkezýär. Häkim eger döwlet tarapyndan goldaw berilmese, gelejekde obada mekdebiň düýbünden ýok bolup gitmeginden we munuň obanyň geljegine ýaramaz täsir etmeginden gorkýar.