«Andižan» we «Alaý» toparlarynyň öňki kapitany hem-de goragçysy Illar Mamatkazin türkmenistanly hüjümçi Artur Geworkýanyň bile oýnan futbolçylarynyň arasynda iň güýçlisidigini aýtdy. Eurasia Football neşirine beren interwýusynda ol Geworkýanyň meýdançada tapawutlanýan ussatlygyny aýratyn belläp geçdi.

Mamatkazin bilen Geworkýan bir döwürde Garşy şäheriniň «Nasaf» klubynda bile çykyş edipdiler. Çalt sowal-jogap bölüminde «Iň gowy bile oýnan futbolçyňyz kim?» diýen sowala Mamatkazin gysga we anyk jogap berdi: «Artur Geworkýan, Nasaf».

Öz karýerasyndaky iň kyn garşydaş barada gürrüň beren goragçy meşhur kamerunly hüjümçi Samuel Eto’ony agzap geçdi. Ol bu futbolça garşy «Anži» topary bilen geçirilen duşuşykda oýnamaga mümkinçilik bolandygyny aýtdy.

Artur Geworkýan 1984-nji ýylyň 22-nji noýabrynda Aşgabat şäherinde doguldy we Turkmenistan futbolynyň görnükli wekilleriniň biridir. Ol Turkmenistan klublary «Nusaý», «Şagadam» we «Aşgabat» bilen bir hatarda, Gazagystanyň hem-de Özbegistanyň birnäçe toparlarynda çykyş etdi.

2011-nji ýylda Geworkýan «Nasaf» bilen AFK-nyň Kubogyny gazanyp, ýaryşyň iň gymmatly oýunçysy diýlip ykrar edildi. 2013–2014-nji ýyllarda Özbegistanyň çempionatynda iň gowy legioner, iň gymmatly futbolçy we iň gowy bombardir boldy. Şeýle hem ol «Nasaf» toparynyň kapitany wezipesini ýerine ýetirdi.

Hüjümçi Turkmenistan milli ýygyndy toparynyň düzüminde hem üstünlikli çykyş etdi. Ol 2007-nji ýylda Kambodža garşy ilkinji duşuşygynda iki gol saldy. 2018-nji ýylyň dünýä çempionatynyň saýlama tapgyrynda Omanyň derwezesine jerime urgusyndan tapawutlandy. Umuman alanyňda, 2007–2016-njy ýyllar aralygynda Turkmenistan ýygyndysy üçin 16 oýun geçirip, 3 gol geçirdi. Şeýle-de ol 2006-njy ýylda futzal boýunça AFK çempionatynda Turkmenistan mini-futbol ýygyndysynyň düzüminde çykyş etdi.