Oýun sanawy
Hytaý bilen Türkmenistanyň arasyndaky bilim ugrundaky hyzmatdaşlyk üstünlikli ösdürilýär – HHR-iň ilçisi
26 Iýun. 11:13Hytaý Halk Respublikasynyň Türkmenistandaky Adatdan daşary we Doly ygtyýarly ilçisi Szi Şumin iki ýurduň ýokary derejeli ýolbaşçylarynyň şahsy goldaw bermegi netijesinde bilim ulgamyndaky hyzmatdaşlygyň örän üstünlikli ösdürilýändigini mälim etdi. Bu barada diplomat Hytaýyň Aşgabatdaky ilçihanasynda geçirilen, hytaý dilini uly höwes bilen öwrenýän iň gowy türkmen talyplaryna we mekdep okuwçylaryna ýörite talyp haklaryny gowşurmak dabarasynyň çäklerinde žurnalistlere gürrüň berdi. «Hytaý ilçisiniň talyp haky» maksatnamasynyň 2026-njy ýyl üçin ilkinji 20 sany ýeňijisi (10 talyp we 10 okuwçy) kesgitlenip, olar Döwletmämmet Azady adyndaky Türkmen milli dünýä dilleri institutynda guralan bäsleşigiň netijeleri boýunça saýlanyldy.
Ilçiniň beren maglumatlaryna görä, häzirki wagtda Hytaýyň öňdebaryjy ýokary okuw mekdeplerinde 10 müňden gowrak türkmenistanly ýaşlar bilim alýarlar, munuň bilen birlikde Türkmenistana gelip okaýan hytaýly talyplaryň sany hem yzygiderli artýar. Szi Şumin iki halkyň özara dilleri, baý medeniýetleri hem-de gadymy däp-dessurlary öwrenmäge bolan gyzyklanmasynyň ýokarydygyny belläp, munuň ikitaraplaýyn strategik gatnaşyklaryň hemmetaraplaýyn we durnukly ösüşiniň aýdyň subutnamasydygyny nygtady. Diplomat hytaý nakylyny mysal getirip, ýeňijilere hytaý dilini öwrenmek arkaly dünýäniň dürli künjeklerinden täze dostlar edinmegi hem-de geljekki okuwlarynda uly üstünlikler gazanmagy arzuw etdi.
Şeýle hem okanyň
Türkmenistandaly mekdep okuwçylary mental arifmetika boýunça dünýä çempionatynda uly üstünlik gazandylar
10 Sen. 11:395-7-nji sentýabr aralygynda Germaniýanyň Bilefeld şäherinde çagalaryň we ýetginjekleriň arasynda mental hasaplamak boýunça dünýä çempionaty (Junior Mental Calculation World Championship 2026) geçirildi. Bu abraýly halkara bäsleşige Hytaý, Ýaponiýa, Germaniýa we Fransiýa ýaly dünýäniň 14 döwletinden 100-den gowrak iň zehinli okuwçylar gatnaşyp, iki sagadyň dowamynda çylşyrymly matematiki amallary diňe ýatdan çözmek boýunça bäsleşdiler.
Ýurt boýunça geçirilen saýlama tapgyrdan üstünlikli geçip, bäsleşige kabul edilen 12 sany türkmen okuwçysy halkara synagda ýokary netijeleri görkezdiler. Bäsleşikde Türkmenabat şäherindäki 41-nji orta mekdebiň 7-nji synp okuwçysy hamana «Kämil Bilim» okuw merkeziniň uçurymy Mekan Nurgeldiýew Junior-1 kategoriýasynda 2477 bal toplap, dünýä boýunça 3-nji orny eýeledi. Şeýle hem ýurdumyzyň mental arifmetika boýunça milli rekordçysy Liwanur Berdiýewa Senior kategoriýasynda iň gowy 8 gatnaşyjynyň hataryna girdi.
Türkmenistanyň ýygyndy toparyna «Kämil bilim» merkeziniň mugallymlary Jahan Durdymämmedowa we Halym Annagurbanow ýolbaşçylyk etdiler. Türkmen okuwçylarynyň bu halkara ýaryşda eýeleýän ýokary orunlary eýýäm däp öwrülip, olar geçen ýyl hem iň gowy onlugyň hataryna girmegi başarypdyrlar.
Blitz