Düýn Gazagystan Respublikasynyň paýtagty Astanadaky L.N.Gumilýow adyndaky Ýewraziýa milli uniwersitetinde Türkmenistanyň Garaşsyzlygynyň şanly 35 ýyllygyna bagyşlanan «tegelek stol» maslahaty geçirildi. Bu çäre şol ýokary okuw mekdebinde bilim alýan türkmen talyplarynyň özbaşdak başlangyjy we guramaçylygy esasynda amala aşyryldy. Maslahat «Garaşsyz, hemişelik Bitarap Türkmenistan – pederleriň arzuwlan ak menzilleri» diýen ruhubelent şygar astynda geçip, oňa uniwersitetiň ýolbaşçylary, professor-mugallymlar düzümi hem-de köpsanly talyplar gatnaşdylar.

Türkmenistanyň Daşary işler ministrliginiň habar bermegine görä, maslahatyň dowamynda ýurdumyzyň garaşsyzlyk ýyllary içinde gazanan ägirt uly üstünlikleri we parahatçylyk söýüji daşary syýasatynyň esasy ugurlary giňişleýin ara alnyp maslahatlaşyldy. Şeýle hem Türkmenistanyň döwlet ýaşlar syýasatynyň çäklerinde amala aşyrylýan özgertmelere, ýaşlaryň döwrebap bilim almagy we ylma bolan höwesini artdyrmak ugrunda döredilýän şertlere aýratyn üns çekildi. Bu maslahat türkmen ýaşlarynyň daşary ýurtlarda öz Watanyna bolan buýsanjyny we wepalylygyny görkezmekde möhüm meýdança boldy.

Türkmen talyplary öz çykyşlarynda Gazagystanda alýan bilimleriniň geljekde Türkmenistanyň ösüşine uly goşant boljakdygyny nygtadylar. Olar halkara akademik hyzmatdaşlygyň ösmegine işjeň gatnaşjakdyklaryna we iki goňşy halkyň arasyndaky dostlukly gatnaşyklary berkidýän «ynsanperwer ilçiler» hökmünde çykyş etjekdiklerine ynandyrdylar. Talyplaryň çykyşlarynda Watan mukaddesligi, ene dili we milli gymmatlyklaryň ähmiýeti baradaky pikirler dabaralandy.

Çäräniň ahyrynda uniwersitetde okaýan daşary ýurtly talyplar we mugallymlar häzirki zaman türkmen-gazak gatnaşyklarynyň ýokary derejesine ýokary baha berdiler. Gatnaşyjylar bilim we ylym ulgamyndaky hyzmatdaşlygyň iki ýurduň geljegini ýakynlaşdyrýan iň ygtybarly köprüdigini bellediler. Hoşniýetli goňşuçylyk we özara ynam ýörelgelerine esaslanýan bu gatnaşyklaryň mundan beýläk-de ösdürilmegi sebitde parahatçylygyň we durnuklylygyň berkemegine hyzmat eder.